"გერმანიის ბუნდესტაგის წარმომადგენლებს არ შეხვდა არც პარლამენტის სპიკერი და არავინ, აღმასრულებელი ხელისუფლებიდან", — ამის შესახებ პარლამენტის ოპოზიციონერმა დეპუტატმა ხათუნა სამნიძემ, გერმანიის ბუნდესტაგის საგარეო ურთიერთობათა კომიტეტის ფრაქციების სპიკერებთან შეხვედრის შემდეგ, განაცხადა.

მისი თქმით, ქართული ოცნება ყველაფერს აკეთებს მისთვის, რომ პრობლემა შეგვექმნას ევროკავშირში გაწევრიანების გზაზე.

“ჩვენ ვხედავთ, რაოდენ ღიაა მათი გადაწყვეტილებები, ყველაფერი გააკეთონ იმისთვის, რომ პრობლემა შეგვექმნას და საქართველოსთვის ევროკავშირში გაწევრიანების გზაზე ყველა კარი დაიკეტოს. შეხვედრაზე სწორედ ამ საფრთხეზე ვისაუბრეთ - თუ “ქართული ოცნება“ რუსულ პოლიტიკას აგრძელებს, მათ შორის “აგენტების კანონის“ აღსრულების დაწყებით, ეს ხელს შეუშლის იმას, რომ ქვეყანა ევროკავშირის ოჯახის წევრი გახდეს.

საუბარი შეეხო წინასაარჩევნო გარემოს, ქვეყნის წინაშე არსებულ პრობლემებს, საფრთხეებსა და გამოწვევებს, თუ რამდენად ჩატარდება თავისუფალი და სამართლიანი არჩევნები საქართველოში“, — განაცხადა ხათუნა სამნიძემ.

კოალიცია ძლიერი საქართველოს ერთ-ერთმა ლიდერმა, ანა ნაცვლიშვილმა ამ თემაზე განაცხადა, რომ “ქართული ოცნების აღმასრულებელმა ხელისუფლებამ საქართველოში მყოფ ბუნდესტაგის წარმომადგენლებს შეხვედრაზე მოუცლელობის გამო უთხრა უარი.

“მაშინ, როცა საქართველოს ევროინტეგრაციისთვის გერმანული მხარის პოზიციას პრინციპული მნიშვნელობა აქვს და ბუნდესტაგის მხრიდან მისაღებია მნიშვნელოვანი სამართლებრივი გადაწყვეტილება, ძალიან მძიმე იყო იმის მოსმენა, რომ “ქართული ოცნების” აღმასრულებელმა ხელისუფლებამ ბუნდესტაგის წარმომადგენლებს განუცხადა, რომ არა აქვთ დრო შეხვდნენ ადამიანებს, რომლებმაც რამდენიმე თვეში საქართველოსთვის პრინციპულად მნიშვნელოვანი გადაწყვეტილება უნდა მიიღონ“, — განაცხადა ანა ნაცვლიშვილმა შეხვედრის დასრულების შემდეგ.