ადამიანის უფლებათა ევროპული კონვენცია მიჩნეულია ადამიანის უფლებების დაცვის ყველაზე ეფექტიან, საერთაშორისო ხელშეკრულებად. მას საქართველომ 1999 წელს მოაწერა ხელი. ხელმოწერით, ქვეყნის ხელისუფლება ვალდებულია, გამოასწოროს ის დარღვევები, რომელთაც ევროპის სასამართლო გამოავლენს.

ევროპის კონვენციასთან მიერთების დღიდან ამ დრომდე ევროპის საბჭოს მინისტრთა კომიტეტს საქართველოს შესახებ 185 საქმე ჰქონდა ზედამხედველობისთვის გადაცემული. აქედან 81 საქმე კვლავ აღუსრულებელია და მომლოდინე საქმედ ითვლება.

საქართველოს წინააღმდეგ მიღებული გადაწყვეტილებების აღსრულების მაჩვენებლით ჩვენი ქვეყანა ბოლო რიგებს იკავებს ევროპის საბჭოს 46 ქვეყანას შორის. მინისტრთა კომიტეტის სტატისტიკით, საქართველოს მიერ საქმეების აღსრულების ტენდენცია არასახარბიელოა. ასევე, აღუსრულებელი საქმეების რაოდენობა თანდათან იზრდება და ხანგრძლივდება მათი აღსრულების პროცესი.