ბრიტანელი სტივენ უადლოუ თვლის, რომ მის ოჯახს ეკუთვნის შექსპირის ერთადერთი პორტრეტი, რომელიც მწერლის სიცოცხლეში შეიქმნა. სტივენ უოდლოუ ათ წელზე მეტი ხნის განმავლობაში მუშაობდა ექსპერტებთან იმის დასადგენად, არის თუ არა ეს მოსაზრება სიმართლე. მტკიცებულებები უფრო და უფრო ძლიერდება.

ამ დრომდე ცნობილი იყო შექსპირის ორი პორტრეტი, რომელიც ცალსახად ასახავს მას, თუმცა ორივე შექსპირის გარდაცვალების შემდეგაა შესრულებული.

ფოტო: News Artnet

თუ აღმოჩნდება, რომ უადლოუს მფლობელობაში არსებულ პორტრეტზე ნამდვილად შექსპირია გამოსახული, მისი ღირებულება 100 მილიონიდან 200 მილიონ ფუნტ სტერლინგამდე იქნება.

უადლოუს მამამ ნამუშევარი, რომელიც ზეთის საღებავითაა შესრულებული, მაშინ შეიძინა, როდესაც ანტიკვარიატების მაღაზიაში მუშაობდა. ეს პორტრეტი 2012 წლამდე მათი სახლის კედელზე ეკიდა, ეჭვი მას შემდეგ გაჩნდა, როდესაც უადლოუს მამამ შექსპირის შესახებ დოკუმენტური ფილმი ნახა და შექსპირი ნახატზე გამოსახულ კაცს მიამსგავსა.

ფოტო: News Artnet

კვლევამ დაადასტურა, რომ ნამუშევარი 1595 წელს არის შესრულებული, როდესაც შექსპირი 31 წელი იყო. ეს რიცხვი მკრთალად ჩანს პორტრეტის ზედა ნაწილშიც.

პორტრეტის ავთენტურობასთან დაკავშირებით კვლევა ჯერ კიდევ მიმდინარეობს, ზოგიერთი თეორეტიკოსი თვლის, რომ შექსპირის აღნიშნული პორტრეტი შეიძლება დაკარგული ორიგინალი იყოს, რომელიც 1959 წელს შეიქმნა, თუმცა მკვლევართა ნაწილი აღნიშნულს არ ეთანხმდება.