რუსეთის უსაფრთხოების სამსახურმა, Deutsche Welle-ს ჟურნალისტის ნიკოლას კონოლისა და უკრაინული არხის "1+1" კორესპონდენტის, ნატალია ნაგორნაიას წინააღმდეგ სისხლის სამართლის საქმე აღძრა — ინფორმაციას BBC ავრცელებს.

FSB-ს ცნობით, მედიის წარმომადგენლებმა "უკანონოდ გადაკვეთეს რუსეთის ფედერაციის სახელმწიფო საზღვარი და გადაიღეს ვიდეოები კურსკის ოლქის სუჯას დასახლების ტერიტორიაზე“.

ჟურნალისტები რეპორტაჟების გადასაღებად ქალაქ სუჯაში იმყოფებოდნენ, იმის აღსაწერად, თუ რა ვითარება იყო იქ უკრაინის შეიარაღებული ძალების შესვლის შემდეგ.

FSB-მ მათ წინააღმდეგ საქმე რუსეთის ფედერაციის სისხლის სამართლის კოდექსის 322- ე მუხლით აღძრა, რაც სახელმწიფო საზღვრის უკანონო გადაკვეთას გულისხმობს.

ცნობისთვის, რუსეთის უსაფრთხოების სამსახურმა გასულ კვირას საზღვრის "უკანონო გადაკვეთისთვის", CNN-ის რეპორტიორისა და 2 უკრაინელი ჟურნალისტის წინააღმდეგაც აღძრა საქმე.