ქართული ოცნების ქუთაისის მაჟორიტარი დეპუტატი, ზაზა ლომინაძე, სოციალურ ქსელში წერს, რომ დღეს ქუთაისელ სპორტსმენებს შეხვდნენ, რომლებმაც მოლდოვაში ჩატარებულ მსოფლიო ჩემპიონატზე მკლავჭიდსა და პარამკლავჭიდში განსაკუთრებულ წარმატებებს მიაღწიეს და სიმბოლური საჩუქრები გადასცეს.

"დღეს, ქუთაისელ სპორტსმენებს შევხვდით, რომლებმაც მოლდოვაში ჩატარებულ მსოფლიო ჩემპიონატზე მკლავჭიდსა და პარამკლავჭიდში განსაკუთრებულ წარმატებებს მიაღწიეს. მათ, საერთაშორისო ასპარეზზე მიღწეული წარმატება მივულოცეთ და სიმბოლური საჩუქრები გადავეცით. ჩემპიონებმა და პრიზიორებმა განსაზღვრული ფულადი ჯილდოც მიიღეს," — წერს ლომინაძე.

პარამკლავჭიდელი მსოფლიო ჩემპიონი ვახტანგ ახობაძე საქართველოში დღეს დაბრუნდა. სოციალურ ქსელში გავრცელდა ქუთაისის აეროპორტში გადაღებული ვიდეო, სადაც ჩანს, რომ ჩემპიონს არც ფედერაციიდან, არც გულშემატკივრებიდან, არც მთავრობიდან და არც მედიიდან არავინ დახვედრია. ვიდეო სოციალურ ქსელში ვირუსულად გავრცელდა და საზოგადოების უკმაყოფილება და პროტესტი გამოიწვია.

"პარამკლავჭიდელ მსოფლიო ჩემპიონს ვახტანგ ახობაძეს სახლში დაბრუნებისას აეროპორტში არავინ დახვდა.

არც ფედერაციიდან, არც გულშემატკივრებიდან, არც მთავრობიდან და არც მედიიდან. უფრო მეტიც ის ავტობუსით დაბრუნდა სახლში. საუბარი მაქვს ქუთაისში დაბრუნებაზე. ეს ყოველივე და ასეთი ხალხის არ დაფასებისთვის ყველა დამნაშავე ვართ“, - წერს Zhorzh Zhamerashvili Facebook-ზე.