ინდოეთის პრემიერ-მინისტრი, ნარენდრა მოდი უკრაინის პრემიერ-მინისტრ ვოლოდიმირ ზელენსკის კიევში ეწვია.

AP-წერს, რომ შეხვედრა ძირითადად ეკონომიკური კავშირების გაძლიერებასა და თავდაცვით თანამშრომლობას შეეხებოდა. თუმცა, ანალიტიკოსების თქმით, ინდოეთის პრემიერის ვიზიტი, რუსეთში განვითარებული კურსკის ამბების ფონზე, ინდოეთისთვის ნეიტრალური პოზიციის გამყარების მცდელობაც იყოს.

გამოცემა წერს, რომ მოდის ვიზიტს “ისტორიული“ უწოდა უკრაინის პრეზიდენტის ადმინისტრაციის უფროსმა, ანდრიი იერმაკმა და აღნიშნა, რომ ინდოეთმა რუსეთ-უკრაინის ომის "მშვიდობიან" შეწყვეტაში, შესაძლოა მნიშვნელოვანი როლი ითამაშოს, ეს კი უკრაინისთვის მშვიდობის ფორმულას წარმოადგენს.

"ჩვენ პატივს ვცემთ ინდოეთს, როგორც მსოფლიოში დიდ დემოკრატ და ძლიერ ქვეყანას [...] თუმცა, ახლა, საჭიროა ითქვას, ვინ არის აგრესორი და ვინ მსხვერპლი", — ამბობს იერმაკი.

უკრაინაში ჩასვლამდე, მოდი პოლონეთში იმყოფებოდა ვიზიტით, სადაც ასევე განიხილა ომთან დაკავშირებული საკითხები. მან მხარდაჭერის პირობა დადო და განაცხადა, რომ ვერც ერთი კონფლიქტი ვერ გადაიჭრება ფრონტის ხაზზე.

მედიის ცნობით, მოდის ვიზიტი უკრაინაში ზელენსკის კრიტიკის შემდეგ გადაწყდა, როცა უკრაინის პრეზიდენტმა ინდოეთის პრემიერი ივლისში მოსკოვში პუტინთან შეხვედრის გამო გააკრიტიკა. საგულისხმოა, რომ მოდის რუსეთში ვიზიტისას რუსულმა რაკეტებმა უკრაინა დაბომბა, რამაც მრავალი ადამიანი შეიწირა.

ზელენსკიმ მაშინ ნარენდრა მოდის რუსეთში ვიზიტი და პუტინთან შეხვედრა შეაფასა, როგორც "უდიდესი იმედგაცრუება და სამშვიდობო მცდელობებისთვის დამღუპველი ნაბიჯი".

მოდის, როგორც ინდოეთის პრემიერ-მინისტრის ვიზიტი უკრაინაში 30 წლის შემდეგ პირველად შედგა. ქვეყნებს ერთმანეთთან 30-წლიანი დიპლომატიური ურთიერთობა აკავშირებთ.

უკრაინულმა მედიამ განაცხადა, რომ უკრაინაში ჩასვლის შემდეგ, მოდი ინდური დიასპორის წარმომადგენლებსაც შეხვდა.

"ინდოელებმა ძალიან თბილი დახვედრა მომიწყვეს", — დაწერა მოდიმ X-ზე.