უკვე 154 დღეა, რაც შუქრუთელები შპს ჯორჯიან მარგანეზის წინააღმდეგ იბრძვიან. მათი მთავარი მოთხოვნა, კომპანიის მხრიდან კომპენსაცია და უსაფრთხო საცხოვრებელი პირობების შექმნაა — აქციის მონაწილეების თქმით, მარგანეცის მოპოვებითი სამუშაოების გამო სახლებს ქვევით მიწა მთლიანად გამოცლილია და შენობები დანგრევის პირასაა.

ფოტო: "მთის ამბები"

12 აგვისტოს, შუქრუთის მკვიდრებს საჩხერის რაიონულმა სასამართლომ პროტესტის "პიკეტირებით" გამოხატვა აუკრძალა და მაღაროების შესასვლელების გათავისუფლება მოსთხოვა. გადაწყვეტილება მოსამართლე ივანე ყიფიანმა მიიღო.

პროტესტანტების თქმით, ისინი დაშლას არ აპირებენ და მიზნის მისაღწევად ბოლომდე იბრძოლებენ. სწორედ ამიტომ, 24 აგვისტოს აქციის მონაწილეები სოფელ შუქრუთში შეიკრიბებიან და ჭორვილისკენ, ქართული ოცნების საპატიო თავმჯდომარის, ბიძინა ივანიშვილის სახლისკენ გაემართებიან, სადაც აქციას გამართავენ.

მათი მთავარი მოთხოვნა, ბიძინა ივანიშვილის ცენტრალურ მთავრობასთან შუამდგომლობა იქნება. ამის შესახებ ინფორმაცია მოძრაობის Facebook გვერდზე ვრცელდება.

"154 დღე კარავში. 24 აგვისტოს ვიკრიბებით ყველა სოფელ შუქრუთში 3 საათისთვის და მივდივართ მშვიდობიანი მსვლელობით სოფელ ჭორვილაში ბიძინა ივანიშვილის სახლთან, რათა ხმა მივაწვდინოთ ცენტრალურ მთავრობას, რომ ჩაერთოს ამ პროცესებში და შეასრულოს მედიატორის როლი.

2019 წლის შემდეგ, ეს არის რიგით მე-5 აქცია. ჩვენ უკიდურეს ფორმებსაც მივმართეთ. ამერიკის ელჩი, კელი დეგნანიც იყო ჩართული პროცესებში და შუამდგომლობას ცდილობდა ცენტრალურ მთავრობას, მოსახლეობასა და კომპანიას შორის. თუმცა, სამწუხაროდ, კომპანიასა და არსებულ პრობლემებს შორის ვერ მოვახერხეთ მედიატორის როლი სახელმწიფომ ითამაშოს. სწორედ ბიძინა ივანიშვილის სახლთან, სოფელ ჭორვილაში მშვიდობიანი მსვლელობით ვაპირებთ მისვლას, რათა ვთხოვოთ, რომ რაიმენაირად, მისი შუამდგომლობით ცენტრალური მთავრობის ამ პროცესებში ჩართვა მოახერხოს და თავისი ნაკისრი ვალდებულება შეასრულოს." — ამბობს აქციის ორგანიზატორი.