სარკევ, სარკევ, გვითხარი, დისნეის რომელი ცნობილი ანიმაციის ახალ, "ლაივ-ექშენ" ვერსიას ველოდებით 2025 წელს?

რა თქმა უნდა, ფიფქიასი. ყველა დროის ერთ-ერთი ყველაზე ცნობილი ზღაპარი მალე ისევ გაცოცხლდება დიდ ეკრანზე. ამჯერად, მთავარ როლში რეიჩელ ზეგლერი მოგვევლინება, რომელსაც მაყურებლები შიმშილის თამაშების ახალი ფილმიდან იცნობენ. რაც შეეხება ბოროტ ჯადოქარს, მას ფილმში ქალი საოცრების ვარსკვლავი გალ გადოთი განასახიერებს.

"სარკევ, სარკევ, მითხარი, ვინ არის ამქვეყნად ყველაზე ლამაზი?", — სწორედ ამ ცნობილი ფრაზით ჩნდება გადოთი ფიფქიას ტრეილერში, რომელიც ცოტა ხნის წინ გავრცელდა.

ფიფქია დისნეის ძველი ფილმების ახალი ვერსიების, ეგრეთ წოდებული რიმეიქების, მორიგი გაჩერებაა. კინოსტუდიამ ბოლო წლებში კონკიას, ალადინის, მეფე ლომის, კრუელას, პატარა ქალთევზას და სხვა ანიმაციების ახლებური კინოადაპტაციები გამოუშვა. აღსანიშნავია, რომ ყველა მათგანს დიდი კომერციული წარმატება მოჰყვა.

რაც შეეხება ფიფქიას, მასზე მუშაობა 2016 წელს დაიწყო, მაგრამ ჯერ კოვიდპანდემიამ, შემდეგ კი გაფიცვებმა ჰოლივუდში, პროცესი გააჭიანურა. ამასთან, პროექტს კრიტიკაც ხვდა წილად; ფილმის შემქმნელები გააკრიტიკეს ფიფქიას როლზე რეიჩელ ზეგლერის, ლათინოამერიკული წარმოშობის მსახიობის, დამტკიცების გამო. ზოგმა კი, მათ შორის, მსახიობმა პიტერ დინკლიჯმა, ორიგინალური ანიმაციის პრობლემურ მხარეზე გაამახვილა ყურადღება: როგორ წარმოაჩენს ფილმი შეზღუდული შესაძლებლობის მქონე პირებს.

ორიგინალური ანიმაციისადმი თავისი უარყოფითი დამოკიდებულება არ დაუმალავს არც რეიჩელ ზეგლერს, მაგრამ მსახიობი ამის გამოც იქცა კრიტიკის სამიზნედ.

ამ ყველაფრის მიუხედავად, დისნეის ფანები მაინც მოუთმენლად ელოდებიან ფიფქიას პრემიერას. ფილმს მაყურებელი 2025 წლის 21 მარტიდან იხილავს.

ასევე იხილეთ:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...