კასპის ყოფილი მერი ქართული ოცნებიდან ოპოზიციურ კოალიციას შეუერთდა. მანუჩარ მერებაშვილმა "ერთიანობა - ენმ-ს" ლიდერებთან ერთად კასპში, მოსახლეობასთან შეხვედრაზე განაცხადა, რომ 2024 წლის საპარლამენტო არჩევნებში გამარჯვების იმედი აქვს და იქვე დასძინა, რომ აღნიშნული გამარჯვების მოპოვება მხოლოდ ერთიანობითაა შესაძლებელი.

“ჩვენ ყველანი ვალდებულები ვართ, ჯერ ვიყოთ საქართველოს სამსახურში, სამშობლოს ვემსახუროთ, ის ინტერესები გავატაროთ და შემდგომ ვიყოთ თითოეული პარტიის ინტერესების გამტარებლები. როცა ადამიანები საუბრობენ იმაზე, რომ ნაბიჯს რომ გადადგამ, რაღაც უხერხულობას ქმნის, ჩემთვის არის მარტივად გადასაწყვეტი – თუ ადამიანს არ გიცხოვრია ისე, რომ რაიმეს შეგრცხვეს შენს განვლილ ცხოვრებაში და დისკომფორტს ეს არ შეგიქმნის, შეგიძლია მიხვიდე ყველგან და გამოხატო შენი აზრი იმასთან დაკავშირებით, თუ რა სჭირდება შენს სამშობლოს

დაგარწმუნებთ თითოეულ თქვენგანს, რომ ერთიანობით შეგვიძლია მოვიპოვოთ ის გამარჯვება, რასაც ყველა ელოდება. ჩემი სათქმელიც ის არის, რომ არავითარი კოალიციური მეორე-მესამე ადგილი. ჩვენ გავალთ პირველ ადგილზე”, – განაცხადა მანუჩარ მერებაშვილმა.

მანუჩარ მერებაშვილი 2017 წლის თვითმმართველობის არჩევნებში, კენჭს “ქართული ოცნების” სახელით იყრიდა, ის კასპის მერად აირჩიეს, თუმცა თანამდებობა 2020 წელს, პირადი განცხადების საფუძველზე დატოვა.