7 აგვისტოს, საღამოს 8 საათზე კოალიცია ინფორმაციის სანდოობისთვის, გმირთა მოედანზე, აგვისტოს ომთან დაკავშირებული ვიდეორგოლის ჩვენებას მოაწყობს. ვიდეორგოლი, რომელიც 2008 წლის რუსული აგრესიის 16 წლისთავს ეხება, კიდევ ერთხელ გვახსენებს, თუ ვინ არის ნამდვილი მტერი და მეგობარი.

კოალიციის განცხადებით, რუსული აგრესია 2008 წელს არ დასრულებულა და დღემდე გრძელდება. 2008 წელს ევროკავშირის შუამდგომლობით მიღწეული ცეცხლის შეწყვეტის შესახებ შეთანხმების მიღებიდან დღემდე, საოკუპაციო რეჟიმმა სულ მცირე 7 საქართველოს მოქალაქე იმსხვერპლა. საქართველოში არსებული ევროკავშირის სადამკვირვებლო მისიის (EUMM) მონაცემების თანახმად, 2013-2024 წლებში, რუსეთის საოკუპაციო რეჟიმის წარმომადგენლებმა უკანონოდ დააკავეს 2,418 პირი, თუმცა დაკავებულთა რეალური მაჩვენებელი გაცილებით მაღალია.

კოალიცია ინფორმაციის სანდოობისთვის მოქმედი თავმჯდომარის, გიორგი მელაშვილის განცხადებით, ოკუპაციის დასასრულებლად და მშვიდობიანი განვითარების ერთადერთი გზაა — ევროინტეგრაციის გაძლიერება და დასავლეთთან ალიანსის შენარჩუნება. "საქართველოს ევროკავშირში ინტეგრაცია შეჩერებულია, ურთიერთობები დასავლეთთან დაძაბული. ამის ფონზე კოალიცია სვამს კითხვას, რატომ მიილტვის საქართველოს მთავრობა რუსეთისკენ, ქვეყნისკენ, რომელიც აგრძელებს ჩვენი მოქალაქეების მკვლელობას და გატაცებას. კოალიცია მიიჩნევს, რომ ერთადერთი გზა ოკუპაციის დასასრულებლად და მშვიდობის უზრუნველსაყოფად არის ევროინტეგრაციის გაძლიერება და დასავლური ალიანსის აღდგენა."

საქართველოს მოქალაქეებს ახსოვთ ქვეყნის ტერიტორიული ერთიანობისთვის დაღუპული ყოველი გმირი, და ისიც თუ რასთან ბრძოლას შესწირეს მათ თავი. აღნიშნულს ადასტურებს ოთარ კირაკოზაშვილი, აგვისტოს ომის დრო დაღუპული კაპიტან გიორგი კირაკოზაშვილის შვილი. კირაკოზაშვილის თქმით: "მამა და მასთან ერთად დაღუპული გმირები, აგვისტოს ომში ჩვენი ქვეყნის ევროპული მომავლისთვის იბრძოდნენ."

გვახსოვდეს აგვისტოს გმირები, გვახსოვდეს ვინ არიან ჩვენი მეგობრები,

გვახსოვდეს სიმართლე!