"ფორთოხლის გამყიდველს" ვიტალი გუგუჩიას სასამართლომ აღკვეთის ღონისძიების სახით 5000 ლარიანი გირაო შეუფარდა — გადაწყვეტილება მოსამართლე ეკატერინე ბებიამ დღეს გამოაცხადა.

ვიტალი გუგუჩია თავს უდანაშაულოდ მიიჩნევს და ამ ყველაფერს პოლიტიკურ დევნად აფასებს. მისი თქმით, "პოსტვის" ჟურნალისტები მასთან პროვოკაციის მოსაწყობად მივიდნენ.

"ეს არის გამოცდილი რუსული მეთოდი, როცა ცდილობენ აქტიური ადამიანები შეაჩერონ როგორც "სამართლებრივად", ისე ზონდერების დახმარებით", — განაცხადა ვიტალი გუგუჩიამ.

მოგვიანებით ცნობილი გახდა, რომ ვიტალი გუგუჩიას საზოგადოებამ გირაოს თანხა სრულად შეუგროვა. ინფორმაცია სოციალურ ქსელში თავად გუგუჩიამ გაავრცელა და ხალხს მადლობა გადაუხადა.

"მადლობა, მადლობა, მადლობა ხალხო! შეგროვდა უკვე თანხა! სიტყვები არ მყოფნის ისეთი მადლიერი ვარ! აუცილებლად გავიმარჯვებთ ერთმანეთის ასეთი გვერდზე დგომით! კიდევ ერთხელ უღრმესი მადლობა! გავიმარჯვებთ სახელოვნად", - წერს გუგუჩია.

შეგახსენებთ, პროკურატურამ ვიტალი გუგუჩიას ბრალი 5 აგვისტოს წარუდგინა. მას საგამომძიებლო უწყება ჟურნალისტისთვის პროფესიულ საქმიანობაში უკანონოდ ხელის შეშლას და ძალადობას ედავება.