დღეს, 23 ივლისს, საქალაქო სასამართლომ, პოლიციელისადმი დაუმორჩილებლობასა და შეურაცხყოფის მიყენების ბრალდებით, ანტისაოკუპაციო მოძრაობის წევრი, დავით ქაცარავა 2000 ლარით დააჯარიმა.

გადაწყვეტილება მოსამართლე კობა ჩაგუნავამ მიიღო.

ქაცარავას წინააღმდეგ, ადმინისტრაციული სამართალწარმოება დაწყებული იყო ასევე მუხლით, რომელიც წვრილმან ხულიგნობას გულისხმობს, თუმცა, სამართალწარმოება მტკიცებულების არარსებობისა და დაუდასტურებლობის გამო შეწყდა.

კობა ჩაგუნავას გადაწყვეტილებით, დავით ქაცარავას ცეცხლსასროლი იარაღის ტარების უფლება ჩამოერთვა ორი წლის ვადით.

გადაწყვეტილების გამოცხადებას არ დასწრებია თავად დავით ქაცარავა.

ქაცარავას სპეცრაზმმა 14 მაისს, რუსული კანონის საწინააღმდეგო აქციაზე სცემა. ის, მოგვიანებით, კლინიკაში გადაიყვანეს, სადაც ოპერაცია ჩაუტარდა — სპეცრაზმელების ძალადობის შედეგად, დავით ქაცარავას სახლის ძვლების მოტეხილობა ჰქონდა.

სპეციალური საგამოძიებო სამსახურის განცხადებით, ქაცარავას ცემის ფაქტზე, გამოძიება დაიწყეს.

ამ თემაზე: დავით ქაცარავა: ყურში ჩამესმა ერთ-ერთი ჯალათის შეძახილი — მოკალი, ეგრევე ვიგრძენი ჩემს კისერზე შემოჭერილი ყელსაბამის ძალა, მგუდავდნენ