ზეწოლის ფონზე, რომელიც კვირების განმავლობაში გრძელდებოდა, ამერიკის მოქმედი პრეზიდენტი, ჯო ბაიდენი აშშ-ის საპრეზიდენტო არჩევნებს გამოეთიშა.

მან თქვა, რომ გადაწყვეტილება დემოკრატებისა და ქვეყნის საუკეთესო ინტერესების გათვალისწინებით მიიღო.

ამასთან, X-ზე დაწერა, რომ საპრეზიდენტო არჩევნებში დემოკრატების კანდიდატად კამალა ჰარისს უჭერს მხარს და საკუთარ გადაწყვეტილებას, რომელიც 4 წლის წინ კამალა ჰარისის ვიცე-პრეზიდენტობასთან დაკავშირებით მიიღო, საუკეთესო უწოდა.

ჰარისმა თქვა, რომ მისთვის პატივია პრეზიდენტის მხარდაჭერა და ყველაფერს გააკეთებს, რომ დემოკრატების კანდიდატი გახდეს.

პარტიის თავმჯდომარეებმა და ლიდერებმა კამალა ჰარისს მხარი დაუჭირეს და ვიცე-პრეზიდენტს "აბსოლუტური მხარდაჭერა" გამოუცხადეს.

"აშშ-ის პარტიის ეს ლიდერები, ყველა დონეზე, არჩევნებში გამარჯვების წინა ხაზზე არიან და იციან, რომ ამ არჩევნების ფსონები არ შეიძლება იყოს უფრო მაღალი“, — წერია დემოკრატიული კომიტეტების ასოციაციის თავმჯდომარეების განცხადებაში.

ისინი მიიჩნევენ, რომ ჰარისი "ყველაზე კვალიფიციური კანდიდატია, რომელსაც შეუძლია გააგრძელოს ეს მემკვიდრეობა და იმსახუროს ქვეყნის პრეზიდენტად".

განცხადების თანახმად, ჰარისმა მოიპოვა პარტიის ლიდერების უმეტესობის მხარდაჭერა, მის წინააღმდეგ ხმა არავის მიუცია, თუმცა რამდენიმემ თავი შეიკავა.