დღეს, 15 ივლისს, დემოკრატიის კვლევის ინსტიტუტმა (DRI) გამოაქვეყნა ანგარიში — საპროტესტო აქციები დაკვირვების ქვეშ.

ანგარიში ასახავს 2023 წლის 6 ნოემბრიდან 2024 წლის 30 მაისის ჩათვლით, პოლიტიკური პარტიების, სამოქალაქო მოძრაობების და აქტივისტების მიერ ორგანიზებულ საპროტესტო აქციებზე დაკვირვების შედეგებს.

• დოკუმენტში გაანალიზებულია იმ პირების სასამართლო პროცესებზე დაკვირვების შედეგები, რომლებიც უშუალოდ საპროტესტო აქციების მიმდინარეობისას ან აქციებთან დაკავშირებით დააკავეს.
• დოკუმენტში საუბარია იმ საკანონმდებლო ინიციატივებზე, რომელთა მიღებაც უარყოფითად აისახება შეკრებისა და მანიფესტაციის უფლებაზე.
• დოკუმენტის მეორე ნაწილი 2023 წლის 6 ნოემბრიდან 15 აპრილამდე გამართულ საპროტესტო აქციებზე დაკვირვების შედეგების მიმოხილვას ეხება.
• ანგარიშის მესამე ნაწილი ეთმობა რუსული კანონის დაინიციირებიდან 2024 წლის 30 მაისამდე განვითარებულ მოვლენებს.

DRI-ის ცნობით, სპეციალური საგამოძიებო სამსახურისა და შინაგან საქმეთა სამინისტროს უმოქმედობა, აქციის მონაწილეთა დაშინებისა და მათზე ზეგავლენის მოხდენის მცდელობები. კერძოდ:

• რუსული კანონის საპროტესტო აქციებზე, დემონსტრანტთა მხრიდან ადგილი არ ჰქონია კანონმდებლობის იმ მასშტაბით დარღვევას, რაც მართლსაწინააღმდეგო შედეგს გამოიწვევდა ან მთლიან შეკრებას ძალადობრივად აქცევდა.
• არც ერთ შემთხვევაში, როდესაც სამართალდამცველებმა აქციის დასაშლელად ფიზიკური ძალა და სპეციალური საშუალებები გამოიყენეს, არ არსებობდა აქციის დაშლის სამართლებრივი საფუძველი.
• აქციების დროს, სამართალდამცავებმა მედიის წარმომადგენლებს პროფესიული საქმიანობის განხორციელებაში არაერთხელ შეუშალეს ხელი.
• რუსული კანონის წინააღმდეგ გამართულ აქციებზე 200-ზე მეტი პირი დააკავეს. დაკავებულებს, არ განემარტათ დაკავების საფუძველი და მათი საპროცესო უფლებები. ხშირად ეზღუდებოდათ ადვოკატის ყოლის უფლება.
• შსს, ხშირ შემთხვევაში, ოჯახის წევრებსა და ადვოკატებს არ აწვდიდა ინფორმაციას დაკავებული პირების ადგილსამყოფლის შესახებ.
• სამართალდამცავები ფიზიკურად გაუსწორდნენ არა ერთ დაკავებულ პირს. რამდენიმე დაკავებულისთვის მიყენებული დაზიანებების ხასიათი (ძირითადად, დაშავებული სახე და ჩამტვრეული კბილები) მოწმობს, რომ დაზიანებები არ შეიძლება იყოს კანონიერი საპოლიციო ღონისძიებების შედეგი და წარმოადგენს პოლიტიკური ოპონენტების მიმართ აშკარა ანგარიშსწორებას.

დემოკრატიის კვლევის ინსტიტუტი წერს, რომ საპროტესტო აქციებთან დაკავშირებულ ადმინისტრაციულ სამართალდარღვევათა საქმეებზე, სასამართლოზე მტკიცებულებების სტანდარტი კვლავ უკიდურესად დაბალია:

"ხელისუფლების მიერ ღიად მხარდაჭერილმა ორგანიზებულმა ჯგუფებმა დააზიანეს არასამთავრობო ორგანიზაციების ლიდერების ან მათი ოჯახის წევრების საკუთრებაში მყოფი სატრანსპორტო საშუალებები, შეურაცხმყოფელი წარწერებით, პლაკატებით და სტენსილებით ააჭრელეს ოფისების ან ორგანიზაციების ხელმძღვანელების საცხოვრებელი სახლების და ჭიშკრების ფასადები".

DRI-ის შეფასებით, ოცნების ერთ-ერთი ლიდერის საჯაროდ გამოქვეყნებული განცხადება და თანმხლები ვიდეო ადასტურებს, რომ მმართველი პარტია არა მხოლოდ ახალისებს საპოლიციო ძალადობას, არამედ, ასევე, დგას საზოგადოებრივი ორგანიზაციების ლიდერების, სამოქალაქო აქტივისტების და პოლიტიკოსების წინააღმდეგ განხორციელებული დევნისა და თავდასხმების უკან.

გაიგე მეტი: დეპუტატი დიტო სამხარაძე აღიარებს, რომ შეურაცხმყოფელი წარწერების ორგანიზატორი თავად არის