ფეხბურთი რომ ქართველების საყვარელი სპორტია, საქართველოს ყოველი მაცხოვრებლისთვისაა ცნობილი. ამ სპორტის მიერ ნაჩუქარი ემოციები ჩვენთვის განსაკუთრებით ძვირფასია, რაც, რა თქმა უნდა, ქართულ კინემატოგრაფიაშიც აისახა. წარმოგიდგენთ 5 ქართულ ფილმს, რომელიც სხვადასხვა ხერხით გვიჩვენებს ფეხბურთის პოეტურ სილამაზეს, სევდას, შრომისა და მიზნისადმი თავდადების ძალას:

1. ფეოლა

ფეოლა რეჟისორ ბაადურ წულაძის ფილმია, რომელიც კინოსტუდია "ქართულმა ფილმმა" 1970 წელს გადაიღო. ფილმი სახლმმართველობის თანამშრომელ ბონდოს ისტორიას გვიყვება, რომელსაც უბნის ბავშვთა საფეხბურთო გუნდის შექმნას ავალებენ. მოვლენების კომიკური განვითარების შემდეგ გუნდი "უქიმერიონი" ოქროს მედლის მფლობელი ხდება, ბიჭები კი მწვრთნელს სიყვარულით ფეოლას არქმევენ, თუმცა ეს ისტორიის დასასრული არაა... ეს საკულტო ფილმი არამხოლოდ ფეხბურთის მოყვარულთა შორისაა პოპულარული - იპოლიტე ხვიჩიას მიერ შესრულებული ფეოლას როლი, ქართველთათვის ერთ-ერთი ყველაზე საყვარელი სახეა.

2. პირველი მერცხალი

პირველი მერცხალი ნანა მჭედლიძის ფილმია, რომლის სიუჟეტი საქართველოში ფეხბურთის პირველ ენთუზიასტებზე მოგვითხრობს. ფილმის პერსონაჟები ერთად გამოცდიან პირველი თამაშების დამარცხებისა და იმედგაცრუების, დაცინვის, მატერიალური უსახსრობის სიმწარეს, თუმცა ფეხბურთის სიყვარულის გამო გამბედავად აგრძელებენ ბრძოლას ამ სპორტისთვის.

3. რას ვხედავთ, როდესაც ცას ვუყურებთ

მიუხედავად იმისა, რომ ალექსანდრე კობერიძის ფილმის სიუჟეტი სრულიად ფეხბურთის ირგვლივ არ ტრიალებს, ამ სპორტის თანმდევი განწყობა და ემოციები ყოველ კადრს გასდევს ფონად. ფილმში მოქმედება ქუთაისში ვითარდება — ფარმაცევტ ლიზასა და ფეხბურთელ გიორგის ერთი ნახვით უყვარდებათ ერთმანეთი, თუმცა მეორე დღეს ყველაფერი იცვლება, რადგან ორივე პერსონაჟი სხვა ადამიანად იღვიძებს... ფილმი მაგიური ელემენტებითაა აღსავსე, როგორც თავად ფეხბურთი, და პოეტური სილამაზითაა ნაჩვენები ამ სპორტის, ქალაქის, სიყვარულის ამბები. ამასთან ერთად, ფილმში საქართველოს ნაკრების ფეხბურთელი, ბუდუ ზივზივაძეც გვხვდება ეპიზოდურ როლში!

4. ქართული ფეხბურთის ტრიო

ქართული საფეხბურთო კინემატოგრაფია დოკუმენტური ფილმებითაც განებივრებულია. გოგი თორაძის 24-წუთიან დოკუმენტურ ფილმში ქართული ფეხბურთის ტრიო მოთხრობილია ძმები არველაძეების ისტორია, რომლებიც მსოფლიოში ცნობილები არიან, როგორც სამი ძმა, ვისაც ერთდროულად უთამაშია ეროვნული საფეხბურთო ნაკრების შემადგენლობაში. ფილმი მილანის სპორტული ფილმების ფესტივალის გამარჯვებული გახდა.

5. ბურთი და მოედანი

რეჟისორ გუგული მგელაძის ფილმი 1961 წელსაა გადაღებული და მოგვითხრობს ფეხბურთზე სიგიჟემდე შეყვარებულ გულშემატკივარ ბუღალტერზე, რომელიც მთელი ძალისხმევით ცდილობს, სანატრელ მატჩზე მოხვდეს და ამასობაში მრავალ აბსურდულ, კურიოზულ თავგადასავალში ეხვევა. "ბურთსა და მოედანში" მთავარ როლს იპოლიტე ხვიჩია ასრულებს — ეს მისი პირველი როლი იყო ფილმში!

იხილეთ ასევე:

• 5 ფეხბურთელი გამორჩეული ჩაცმის სტილით — ნახეთ ფოტოები
• ქვიზი: საქართველოს ნაკრების რომელი ფეხბურთელი ხარ?
• კროსვორდი: გამოიცანი ქვეყანა ფეხბურთელით