საქართველოს ბანკი ახალგაზრდებისთვის განათლების შესაძლებლობების შექმნას განაგრძობს. სწორედ ამ მიზნით, სტიპენდიების პროექტს ახორციელებს, რომლის ფარგლებშიც 20-მდე პარტნიორი უნივერსიტეტის სტუდენტებს აძლევს შესაძლებლობას, მიიღონ სწავლის სრული ან ნაწილობრივი დაფინანსება. უკვე გამოვლინდა 160-ზე მეტი სტიპენდიატი. მათი რაოდენობა კი მუდმივად იზრდება. შეავსეთ აპლიკაცია და გახდით საქართველოს ბანკის სტიპენდიატი!

ბევრი წლის წინ მეც ვიყავი აბიტურიენტი. საშინელი გრძნობაა ტანში. მთელი წელი იტანჯები.

ყველგან ვმეცადინეობდი. მათემატიკას, ფიზიკას და ქართულს.

ერთხელაც ფიზიკის მეცადინეობისას ერთი ღვთისნიერი კაცი მოვიდა. მიყურა.

- რას მეცადინეობ?

- ფიზიკას.

- და ფიზიკაში რას?

- ჰმ, მექანიკას.

- F = ma?

- კი, მაგასაც.

სერიოზული სახე მიიღო, ჩემკენ დაიწია და ცოტა კონსპირაციულად ჩურჩულით მითხრა:

- აი ერთ რამეს გეხვეწები, არასდროს, არასდროს, არასდროს არ დაიმახსოვრო ფორმულა.

- რა? აბა ისე როგორ ჩავაბარო?

- არა, ვერ ვთქვი. ფორმულა გაიგე და არ დაიმახსოვრო. როცა გაიგებ, ისედაც არასდროს დაგავიწყდება და როცა დაიმახსოვრებ, ვერასდროს გაიგებ ბოლომდე.

…

მგონი დღესაც მის ამ ნათქვამზე ვფიქრობ. რა კარგი რამე მირჩია. რამდენი რამისგან მიხსნა. თან რა კარგ დროს… თან რა მარტივად.

ალბათ ცხოვრების ყველაზე დიდი გადაწყვეტილებაც ეგ არის. განასხვავე "ვიცი" და "გავიგე", და აირჩიე ყოველთვის "გავიგე".

ეს გაგებაც ისეთი ოხერი რამაა. ვერც ვერავის აჩუქებ, ვერც ვერავისგან გეჩუქება. იქ არაა, სადაც შენი სურვილია. არც იქ, სადაც შენი შრომაა. არც იქ, სადაც შენი გაღებული ხარჯია.

მხოლოდ იქაა, სადაც დაცარიელდები, სადაც ახალ აზრს შემოიპატიჟებ შენში. შემოიპატიჟებ იმისთვის, რომ თავიდან შეხედო. ვიცის გარეშე შეხედო. ახლის დანახვისთვის შემოიპატიჟებ. ახლოდან რომ დააკვირდე და თუ იცნობ - მერე უკვე თავისით დაგემართება "გავიგე".

…

ამას წინათ ჩემი ერთ-ერთი კუმირი მომღერლის ინტერვიუს ვუყურებდი. მისი სახელია - კაუშიკი ჩაკრაბორტი.

ჰოდა ერთმა ახალგაზრდამ ჰკითხა:

- კაუშიკი, როგორ ახერხებთ რომ ამდენს მღერით, ამდენს იმპროვიზირებთ და არასდროს არ მეორდებით. ყოველთვის ახალ ფრაზებს იგონებთ?

- ყველა მომღერალს აქვს თავისი მიგნებები, კომფორტულად სამღერი ფრაზები, ყურში გამჯდარი ინტონაციები, პასაჟები, რომლებიც ვიცით, რომ გამოგვდის. თუ ასეთი ჯერ არ იცით, კარგად მოუსმინეთ თქვენს თავს, მოუსმინეთ თქვენსავე ჩანაწერებს და მიხვდებით. შემდეგ ამოწერეთ ეს ფრაზები, შეაგროვეთ, და რაც მთავარია, არასდროს იმღეროთ!

ეს არის რჩევა, რომელიც ჩემში სიცოცხლეს აღვიძებს. ეს ფრაზა ჩემთვის იგივეა, რაც: ნუ ეძებ ცოცხალს მკვდრებში. მკვდრებს მკვდრები მიხედავენ. შენ ცოცხალს გაჰყევი.

ჰოდა აბიტურიენტებსაც ამას ვურჩევ. ნუ აგროვებთ ცოდნას, ნუ ინადირებთ ნიშნებზე, ნუ შეგიპყრობთ წარმატების სურვილი,

არამედ მიხვდით, გაიგეთ და სხვა ყველაფერი თავისით მოხდება.

სამყარო მოხდება თქვენში! და მერე თქვენც დაბადებთ ახალ, თქვენ უნიკალურ სამყაროებს. ჩვენ ხომ ამისთვის გავჩნდით და ამით იქმნება სამყარო.