მიხეილ სააკაშვილი, რომელსაც რამდენიმე დღის წინ უკრაინის ხელისუფლებამ მოქალაქეობა ჩამოართვა, "კურიერთან" ინტერვიუში ამბობს, რომ ამ ნაბიჯით პრეზიდენტმა პოროშენკომ "ყელი გამოიჭრა":

"პოროშენკომ გამომაცხადა თავის მთავარ ოპონენტად უცხოელებისა და თავისი მოქალაქეების თვალში. შემდეგ აიღო და საკუთარი ხელით გამოიჭრა ყელი იმიტომ, რომ მთავარი ოპონენტი გააგდო ქვეყნიდან. ასეთი რაღაცეები მთავრდება ძალიან ცუდად.

საქართველოში ივანიშვილმა პროვოცირება გაგვიკეთა, რომ მისთვის მოქალაქეობა ჩამოგვერთმია და მიუხედავად ამისა, კანონი შევცვალეთ და არჩევნებში მივაღებინეთ მონაწილეობა. კარგი იყო თუ ცუდი, სხვა თემაა".

მიხეილ სააკაშვილის თქმით, ის არ აპირებს არცერთი სხვა ქვეყნის მოქალაქეობის მიღებას, ან თავშესაფრის მოთხოვნას. როგორც ის ამბობს, გააგრძელებს სამართლებრივ ბრძოლას უკრაინის მოქალაქეობის აღსადგენად და ასევე, დაიწყებს მასშტაბურ პოლიტიკურ მობილიზაციას უკრაინაში.

უკრაინის ხელისუფლების ინფორმაციით, სააკაშვილისთვის მოქალაქეობის ჩამორთმევის საფუძველი გახდა შესაბამისი კანონის ერთ-ერთი მუხლი, რაც მოქალაქეობის მიღებას ტყუილის გამოყენებით გულისხმობს. კერძოდ, სააკაშვილმა ანკეტაში მიუთითა, რომ მის მიმართ არ მიმდინარეობდა სისხლის სამართლებრივი დევნა რომელიმე სახელმწიფოში, თუმცა საქართველოში მის წინააღმდეგ არაერთ საქმეზეა გამოძიება დაწყებული.