საქართველოს პარლამენტის აპარატი განცხადებას ავრცელებს, სადაც პრეზიდენტ მარგველაშვილს სპეციალური ზომების მიღებისკენ მოუწოდებს, რათა "შეწყდეს პრეზიდენტის წარმომადგენელთა მხრიდან საქართველოს პარლამენტისადმი უპატივცემულო დამოკიდებულების გამოვლენა".

განცხადებაში ნათქვამია, რომ პრეზიდენტის ადმინისტრაციის საჯარო მოხელეებმა არაერთხელ დაარღვიეს საქართველოს პარლამენტთან ურთიერთობის ნორმები:

"ეს არ არის პირველი შემთხვევა, როდესაც პრეზიდენტის ადმინისტრაციის საჯარო მოსამსახურეები შეურაცხყოფას აყენებენ ხალხის მიერ არჩეულ პარლამენტარებს, რაც ცხადყოფს, რომ პროცესი არის წახალისებული და მართული საქართველოს პრეზიდენტის მხრიდან. ნებისმიერ შემთხვევაში, როდესაც ეთიკის ნორმებს არღვევს პრეზიდენტის ადმინისტრაციის საჯარო მოსამსახურე და ამას არ მოჰყვება სათანადო რეაგირება პრეზიდენტის მხრიდან - ეს არის თანაბრად პრეზიდენტის დამოკიდებულებაც პარლამენტის მიმართ".

26 ივლისს, პარლამენტში შვიდი თვითმმართველი ქალაქის გაუქმებაზე პრეზიდენტის შენიშვნების განხილვის შემდეგ, შემაჯამებელი სიტყვით გამოსვლისას, ირაკლი კობახიძემ ანა დოლიძეს სიტყვა რამდენჯერმე შეაწყვეტინა. კობახიძის მტკიცებით, დოლიძე საჯარო მოსამსახურეა და ეთიკური სტანდარტის თანახმად, მას პოლიტიკური განცხადებების გაკეთება არ შეუძლია.

სხდომის დასრულების შემდეგ, ანა დოლიძემ ირაკლი კობახიძეს "უზრდელი" და "თანამდებობისთვის შეუფერებელი" უწოდა.