რა ხდება: ხალხის ძალის ერთ-ერთი ლიდერი, გურამ მაჭარაშვილი მიიჩნევს, რომ ყველა ის ადამიანი, რომელიც რუსულ კანონს აპროტესტებს, ჯაშუშობის მუხლით უნდა გასამართლდეს.

დეტალები: მაჭარაშვილმა განცხადება გაავრცელა, სადაც წერია, რომ ქვეყანაში მდგომარეობა უკვე დამშვიდდა, "პროტესტის მოტყუებული მონაწილეები კი სახლებში, უნივერსიტეტებსა და სამსახურებში დაბრუნდნენ". მისი თქმით, არ ჩერდებიან მხოლოდ "ჯაშუშური ქსელის წარმომადგენლები საქართველოში".

ამიტომ, დეპუტატის თქმით, ჯაშუშობის ბრალდებით უნდა გასამართლდეს უკლებლივ ყველა, ვინც კანონის მიღებას კვლავ აპროტესტებს:

  • "ასევე, ჩართულია ბულინგსა და შეურაცხყოფაში, ცდილობს ფსიქოლოგიურ ძალადობას კანონის მიმღებთა და მხარდამჭერთა, აგრეთვე მათი მშობლების, შვილების და სხვა ოჯახის წევრების მიმართ", — წერს მაჭარაშვილი.

მათი გასამართლება, დეპუტატისთვის, "ეგზისტენციალური საკითხია".

  • "ვფიქრობ, რომ საპარლამენტო არჩევნების შემდეგ ტელევიზიის პირდაპირ ეთერში ამგვარი სასამართლო პროცესის გამართვას ალტერნატივა არ აქვს, ქართველი ხალხი იმსახურებს, ბოლოსდაბოლოს, იცოდეს იმ ადამიანების სახელები და გვარები, ვინც არ ასვენებს ამ ქვეყანას, ვინც ემსახურება არა საკუთარ სამშობლოს, არამედ უცხო ქვეყნის ამოცანებს, ვინც ცდილობს საქართველო გახვიოს არეულობაში და ომის უბედურებაში. სასამართლო პროცესები კი უნდა იქცეს ერთგვარ ნიურნბერგის პროცესად, რომ მომავალში ჯაშუშობაზე ხელის მოწერის ცდუნება აღარასოდეს აღარავის გაუჩნდეს", — წერია მაჭარაშვილის განცხადებაში.