თბილისის მერობის დამოუკიდებელი კანდიდატი, ალეკო ელისაშვილი ფეისბუქის საკუთარ გვერდზე, NDI-ის კვლევის შედეგებს ეხმაურება. მისი თქმით, იმის გათვალისწინებით, რომ კვლევის ჩატარებისას მას საარჩევნო კამპანია ოფიციალურად არ ჰქონდა დაწყებული, მეორე ადგილი "არ არის ცუდი დასაწყისი":

"ეს შედეგი ბუნებრივია არ არის საკმარისი და მე არჩევნებში მხოლოდ მონაწილეობისთვის არ ვირჯები, არამედ იმისათვის რომ ხალხის დახმარებით გავიმარჯვოთ და თბილისელების პრობლემების მოგვარებას შეუდგეთ".

ელისაშვილი აღნიშნავს, რომ კვლევიდან გამომდინარე, მოსალოდნელია მეორე ტური:

"ოპოზიციური ხმები ჯამში გაცილებით მეტია ვიდრე ხელისუფლების. ეს აჩვენებს რამდენად დაშორდა ხელისუფლება ხალხს და რამდენად წარმოდგენა არ აქვთ რა უჭირთ უბრალო თბილისელებს და რა პრობლემებით ცხოვრობენ. სულ რაღაც რამდენიმე წლის თავზე ხალხმა აჩვენებს რომ მათ მობეზრდათ უპატრონოდ მიგდებული ქალაქის და ქვეყნის ყურება. ახლა მთავარია რომ თითოეულმა თბილისელმა ბოლომდე ირწმუნოს, რომ ჩვენ შეგვიძლია გარდავტეხოთ და შევცვალოთ ვითარება".

NDI-ის კითხვაზე, ხვალ რომ თბილისის მერის არჩევნები ტარდებოდეს, მთლიანი მოსახლეობიდან, ხმების 30 პროცენტს ქართული ოცნების კანდიდატი კახა კალაძე მიიღებდა, 19 პროცენტს კი ალეკო ელისაშვილი.