მოკლედ: საქართველოს პარლამენტის თავმჯდომარის, შალვა პაპუაშვილის განცხადებით, პარლამენტი, პრეზიდენტის ვეტოს რუსულ კანონზე, შემდეგ სასესიო კვირაში დაძლევს.

  • "იცით, რომ ვეტო შემოსულია, ბიუროს დღევანდელ სხდომაზე განსახილველად გადაეცემა იურიდიულ საკითხთა კომიტეტს და შემდეგ სასესიო კვირაში დაიძლევა", — განაცხადა პაპუაშვილმა დღეს, 20 მაისს, მედიასთან კომენტარში.

დეტალები: პაპუაშვილის თქმით, ფაქტი, რომ პრეზიდენტმა სალომე ზურაბიშვილმა კანონის მოქმედების ვადად ერთი დღე განსაზღვრა, საზოგადოების დაცინვაა:

  • "დასცინის ქართველ ხალხს [სალომე ზურაბიშვილი], რომ ერთდღიანი კანონი უნდა მივიღოთ. კონსტიტუციის დარღვევის შემდეგ ქართველი ხალხის დაცინვაზე გადავიდა".

კონტექსტი: 18 მაისს, სალომე ზურაბიშვილმა, მთავრობის მიერ მესამე მოსმენით მიღებულ რუსულ კანონს, ვეტო დაადო: "ეს კანონი არ ექვემდებარება არავითარ ცვლილებას, არავითარ გაუმჯობესებას და ამდენად, არის ძალიან მარტივი ვეტო, ეს კანონი უნდა გაუქმდეს".

  • პრეზიდენტის მოტივირებული შენიშვნები კანონის ამოქმედებიდან მის ერთ დღეში გაუქმებას ითვალისწინებს.
  • ქართულ ოცნებას პრეზიდენტის ვეტოს დაძლევა შეუძლია. ამისთვის 76 ხმაა საჭირო, რუსულ კანონს კი უმრავლესობის 84-მა დეპუტატმა დაუჭირა მხარი.

გაიგე მეტი: რა მოხდება პრეზიდენტის ვეტოს შემდეგ, პროცედურულად