მოკლედ: სახალხო დამცველი ლევან იოსელიანი დავით ქაცარავას ცემის ფაქტს ეხმაურება და აცხადებს, რომ შემაშფოთებელია იმ ძალადობრივი ქმედებების ხილვა, რასაც სამართალდამცავი უწყება არაერთ შემთხვევაში კვლავ იყენებს.

დეტალები: სახალხო დამცველის რწმუნებულები კლინიკაში დავით ქაცარავას სანახავად მივიდნენ, თუმცა, სახის ძვლების მოტეხილობის გამო, ქაცარავას უტარდება ოპერაცია და მისი ნახვა ვერ შეძლეს:

  • "სახალხო დამცველი აქციების პარალელურად გამუდმებით მიუთითებს, რომ პოლიციამ უნდა გამოიყენოს მხოლოდ აუცილებელი და პროპორციული ძალა, და იმოქმედოს კანონის ფარგლებში".
  • სახალხო დამცველი მოუწოდებს შინაგან საქმეთა სამინისტროს და სპეციალურ საგამოძიებო სამსახურს — უმოკლეს დროში ჩაატაროს ეფექტიანი გამოძიება, ყველა მოძალადე პოლიციელის მაქსიმალურად სწრაფი იდენტიფიცირების მიზნით.

მსგავსი: მოვუწოდებთ სპეციალური დანიშნულების რაზმის თანამშრომლებს, არ შეასრულონ უკანონო ბრძანებები — საია

სახალხო დამცველი აღნიშნავს, რომ იმ ფონზე, როდესაც უკვე დაკავებულია აქციის ექვსი მონაწილე სისხლის სამართლის წესით და ადმინისტრაციული წესით — ჯამში 150-ზე მეტი მოქალაქე, დღემდე არც ერთი პოლიციელის პასუხისმგებლობის საკითხი არ დამდგარა.

  • "კიდევ ერთხელ ხაზს ვუსვამთ, რომ ეს წაახალისებს დაუსჯელობის განცდას", — აცხადებს სახალხო დამცველი და აღნიშნავს, რომ აქციებზე სამართალდამცავების მხრიდან ადგილი აქვს ფიზიკური ძალადობის შემთხვევებს ჟურნალისტების მიმართ.
  • "ჟურნალისტის საქმიანობაში ხელშეშლა და მასზე ძალადობა უკიდურესად მიუღებელია და საჭიროებს დაუყოვნებლივ რეაგირებას — ეფექტიანი გამოძიების ჩატარებას".

გაიგე მეტი: აქციაზე დაკავებული დავით ქაცარავა მძიმედ არის ნაცემი — ის კლინიკაშია გადაყვანილი

კონტექსტი: დავით ქაცარავა სპეცრაზმმა დღეს, 14 მაისს, პარლამენტთან დააკავა, რუსული კანონის მიღების შემდეგ.

  • ექიმის თქმით, ქაცარავას თვალი დაზიანებული აქვს, თუმცა მხედველობა არ დაუკარგავს.
  • ნაცემი აქტივისტი სტაციონარში 2-3 დღის განმავლობაში დარჩება
  • სპეციალური საგამოძიებო სამსახურის განცხადებით, ქაცარავას ცემის ფაქტზე, გამოძიება დაიწყეს.

ასევე, ნახეთ: დავით ქაცარავას ოპერაცია ჩაუტარდა — მას სახის ძვლების მოტეხილობები აქვს