რა ხდება: დღეს, 14 მაისს, საქართველოს პარლამენტში რუსული კანონის მესამე, საბოლოო განხილვის პარალელურად, საქართველოს პრემიერ-მინისტრი ირაკლი კობახიძე მთავრობის ადმინისტრაციაში შეხვდა ჯიმ ო'ბრაიენს — ევროპისა და ევრაზიის საკითხებში ამერიკის შეერთებული შტატების სახელმწიფო მდივნის თანაშემწეს.

  • შეხვედრა რამდენიმე საათს გაგრძელდა.
  • შეხვედრის შესახებ ინფორმაცია ახლახან გაავრცელა პრემიერ-მინისტრის აპარატმა.

დეტალები: "გაიმართა ხანგრძლივი შეხვედრა, სადაც შედგა გულწრფელი საუბარი ქართულ-ამერიკული ურთიერთობების ყველა საკითხზე, მათ შორის, საქართველოში გასული რამდენიმე წლის განმავლობაში განვითარებულ პროცესებზე", — იუწყება მთავრობის ადმინისტრაცია. მათი თქმით, კობახიძემ და ო'ბრაიენმა "ამ პროცესებთან დაკავშირებით ერთმანეთს თავიანთი წუხილები გაუზიარეს."

გავრცელებული განცხადებიდან ცნობილი ხდება, რომ:

  • ირაკლი კობახიძემ ჯიმ ო'ბრაიენს ესაუბრა რუსული კანონის მიღების საჭიროებაზე; კანონის, რომელსაც ხელისუფლება უწოდებს კანონს გამჭვირვალობის შესახებ.
  • კობახიძემ ამერიკელ მაღალჩინოსანთან გამოთქვა მმართველი გუნდის მზაობა, ვეტოს პროცედურის ფარგლებში საერთაშორისო პარტნიორების ყველა სამართლებრივი შენიშვნა ყურადღებით განიხილოს.
  • პრემიერ-მინისტრმა აღნიშნა, რომ "საქართველოს ხელისუფლება დაინტერესებულია აშშ-სთან პარტნიორობის გაღრმავებით, რაც ორმხრივ ძალისხმევას და სამართლიან ურთიერთდამოკიდებულებას მოითხოვს."

კიდევ რა ვიცით შეხვედრის შესახებ: სახელმწიფო მდივნის თანაშემწისა და პრემიერ-მინისტრის შეხვედრა 2 საათს უნდა გაგრძელებულიყო, თუმცა დაგეგმილ დროს გადააჭარბა.

  • შეხვედრას აშშ-ის ელჩი, რობინ დანიგანიც ესწრებოდა.
  • შეხვედრაზე იყო საქართველოს საგარეო საქმეთა მინისტრიც.

კიდევ რა ვიცით ო'ბრეინის ვიზიტის შესახებ: ო'ბრაიენი ახლა ბიზნესის წარმომადგენლებს ხვდება, მოგვიანებით კი შეხვდება ოპოზიციას და არასამთავრობო სექტორის წარმომადგენლებს.

  • დაგეგმილია შეხვედრა საქართველოს პრეზიდენტთანაც.
  • ჯეიმს ო'ბრაიენი დღეს მედიის კითხვებსაც უპასუხებს.
  • გუშინ გავრცელდა ინფორმაცია, რომ დაგეგმილი იყო მისი შეხვედრა ქართული ოცნების საპატიო თავმჯდომარე ბიძინა ივანიშვილთანაც.
  • სამთავრობო არხებმა, იმედმა და რუსთავი 2-მა ჯერ გამოაქვეყნეს, თუმცა მალევე წაშალეს ინფორმაცია იმასთან დაკავშირებით, რომ ო'ბრაიენს ივანიშვილისთვის სანქციების პაკეტი ჩამოაქვს.

13 მაისის დღის ბოლოს ბრიფინგი გამართა ირაკლი კობახიძემ და თქვა, რომ ო'ბრაიენს სურდა ივანიშვილთან შეხვედრა, თუმცა ივანიშვილმა ამერიკელ მაღალჩინოსანს უარი უთხრა.