მოკლედ: საქართველოს იუსტიციის მინისტრს, რატი ბრეგაძეს, სადოქტორო დისერტაციის ხელმძღვანელმა, გერმანელმა პროფესორმა ოტო ლუხტერჰანდმა მისწერა, რომ იმედოვნებს, საქართველოს პარლამენტი "გამოიჩენს სიბრძნესა და ძალას" და რუსულ კანონს უკან გაიწვევს.

  • ამის შესახებ ინფორმაცია რადიო თავისუფლებამ გაავრცელა.

რა მოხდა: 40-მდე იურისტმა, პროფესორმა და მკვლევარმა, 30 აპრილს, ქართული ოცნებისა და მთავრობის წარმომადგენლების სადოქტორო დისერტაციების ხელმძღვანელ პროფესორებს საჯარო წერილით მიმართა. ადრესატი ოთხი პროფესორი იყო:

  • მარტინ ჰეგერი (ანრი ოხანაშვილის ხელმძღვანელი);
  • ოტო ლუხტერჰანდი (რატი ბრეგაძის ხელმძღვანელი),
  • მაიკლ მარტინეკი (შალვა პაპუაშვილის ხელმძღვანელი)
  • და მარტინ მორლოკი (ირაკლი კობახიძის ხელმძღვანელი).
  • ხელმომწერებმა მათ მოუწოდეს, ხმა აემაღლებინათ ყოფილი სტუდენტების მიერ რუსული კანონის მხარდაჭერის გამო.

დეტალები: ოტო ლუხტერჰანდმა, რატი ბრეგაძეს, ვრცელი წერილი 2024 წლის 1 მაისს გაუგზავნა.

  • წერილში, პროფესორი "იურიდიული და, მით უფრო, პოლიტიკური თვალსაზრისით გაუგებარს" უწოდებს რეალობას, რომელშიც, ერთი მხრივ, ოცნება ამბობს, რომ ევროკავშირის წევრობას ესწრაფვის, მეორე მხრივ კი, რუსულ კანონს იღებს.
  • ლუხტერჰანდი წერს, რომ კანონპროექტი "თავისი მიდგომით, სტრუქტურითა და, ნაწილობრივ, შინაარსითაც" მისდევს რუსეთის უცხოელი აგენტების კანონს.

პროფესორი აღნიშნავს, რომ იოსებ სტალინის ფიგურა "ქართულ მასობრივ ცნობიერებაში დღემდე შემაშფოთებლად დიდი აღიარებით სარგებლობს":

  • შეგვიძლია თუ არა, ამის გათვალისწინებით, სრულიად გამოვრიცხოთ, რომ ერთ მშვენიერ დღეს საქართველოში ხელისუფლებას ხელში ჩაიგდებს აშკარად ნაციონალურ-ავტორიტარული, "ანტიდასავლური" რეჟიმი, რომელიც იმ ადამიანებს დასჯის როგორც "უცხოელ აგენტებს", რომლებმაც კერძო ფონდების, ანუ არასამთავრობო ორგანიზაციების დაფინანსებით საზღვარგარეთ სამართლებრივი ხარისხი მიიღეს?"

ბოლო ხაზი: ოტო ლუხტერჰანდი წერს, რომ წერილის ასლს მიიღებენ ბრეგაძის კოლეგების — ირაკლი კობახიძის, შალვა პაპუაშვილისა და ანრი ოხანაშვილის სადოქტორო ნაშრომის ხელმძღვანელი პროფესორები.