დღეს, 25 ივლისს, თბილისის საქალაქო სასამართლოში, კლინიკა ლანცეტის დირექტორის, ფარმან ჯეირანლის საქმის განხილვა დაიწყო. მას პაციენტებისგან დიდი ოდენობით თანხის მოტყუებით დაუფლება ედება ბრალად.

აღნიშნულ საქმეზე, აზერბაიჯანელი ჟურნალისტი, ხადიჯა ისმაილოვა ფეისბუქის საკუთარ გვერდზე მოუწოდებს ქართველ მეგობრებს, დაესწრონ მის სასამართლო პროცესს და ნახონ არის თუ არა ეს საქმე, თბილისში შესრულებული ბაქოს დაკვეთა:

"ფარმან ჯეირანლი აზერბაიჯანში ცნობილია, როგორც არსებული რეჟიმის წინააღმდეგი. მისი კლინიკა თბილისში, ბევრ აზერბაიჯანელ ოპოზიციონერს უფასო მკურნალობას სთავაზობდა. აზერბაიჯანული პრო-სახელისუფლებო მედია Virtualaz მას ოპოციზიონერთა ერთ-ერთ სპონსორად მოიხსენიებდა".

ხადიჯა ისმაილოვა წერს, რომ ჯეირანლი პირველი იყო, ვინც დააკავეს და აღნიშნავს იმასაც, რომ პოლიციას არ დაუკითხავს მთავარი ექიმი, ვინც ჩვეულებრივ პასუხისმგებელია სამედიცინო შეცდომებზე:

"ჩვენ არ გვჯეროდა, რომ საქართველოს მთავრობა აზერბაიჯანის მოთხოვნით ვინმეს დააკავებდა და გამოძიებას დაელოდებოდა. მოგვიანებით გავიგეთ, რომ კლინიკის დირექტორი დააკავეს. ჩვეულებრივ შემთხვევაში, ეს იქნებოდა მთავარი ექიმი, რომელიც პასუხისმგებელია სამედიცინო შემთხვევებზე. თუმცა, არავითარი სისხლის სამართლის საქმე არ აღძრულა ექიმზე. ექიმი, რომელიც ახლა უკვე ბაქოშია, ჯეირანლის ადვოკატებთან ჩვენების მიცემაზე უარს ამბობს, იმიტომ რომ აზერბაიჯანის მთავრობამ აუკრძალა. ეს ყველაფერი აფგან მუხტარლის გატაცების კვალზე გადის".

2016 წელს, თბილისში, კლინიკა ლანცეტში ორი ოპერაცია ჩატარდა, რომლის შედეგად გიორგი ჩუბინიძე და კარლო კეკელიძე გარდაიცვალნენ.

2017 წლის 22 მაისს, საქართველოს პროკურატურამ პაციენტებისგან დიდი ოდენობით ფულადი თანხის მოტყუებით დაუფლებისა და სიცოცხლისთვის ან ჯანმრთელობისთვის საფრთხის შემქმნელი გარემოების შესახებ ინფორმაციის დამალვის ბრალდებით, კლინიკის დირექტორი ფარმან ჯეირანლი დააკავა. ბრალდებული დანაშაულს არ აღიარებს.