გერმანიაში ჩადენილი მძიმე დანაშაულებისთვის, ინტერპოლის მიერ წითელი ცირკულარით ძებნილ პირს ქუთაისის საქალაქო სასამართლომ უვადო პატიმრობა მიუსაჯა.

საქართველოს შინაგან საქმეთა სამინისტროს ცნობით, 1986 წელს დაბადებულმა გ.ჩ.-მ და მისმა თანამზრახველმა 2013 წლის ივნისში ქალაქ ნიურნბერგში, საცხოვრებელ ბინაში ფარულად შეაღწიეს, ბინის მესაკუთრეს ხელ-ფეხი შეუკრეს და გაგუდეს. ბინიდან კი, სხვა ნივთებთან ერთად, როლექსის მარკის, 2 500 ევროდ ღირებული მაჯის საათი გაიტაცეს და შემთხვევის ადგილიდან მიიმალნენ.

შსს-ს ინფორმაციით, გერმანული მხარის მიერ გამოგზავნილი სისხლის სამართლის მასალების საფუძველზე, შსს-ს იმერეთის, რაჭა-ლეჩხუმისა და ქვემო სვანეთის პოლიციის დეპარტამენტმა გამოძიება ყაჩაღობისა და დამამძიმებელ გარემოებებში ჩადენილი განზრახ მკვლელობის ფაქტებზე აწარმოა და მიმალვაში მყოფი ძებნილი 2016 წლის ნოემბერში, თბილისში დააკავა.