რა ხდება: იურიდიულ საკითხთა კომიტეტის სხდომა, სადაც რუსულ კანონს განიხილავენ, კვლავ ხმაურისა და კამათის ფონზე მიმდინარეობს.

  • კომიტეტის თავმჯდომარემ, ლევან ბეჟაშვილისა და გიორგი ვაშაძის შემდეგ, დარბაზი ქალ დეპუტატებს — სალომე სამადაშვილსა და თამარ კორძაიასაც დაატოვებინა.

დეტალები: ლელოს დეპუტატმა სალომე სამადაშვილმა სხდომაზე განაცხადა, რომ კანონის გამო, შესაძლოა, საქართველოს მოქალაქეებისთვის ევროკავშირის ქვეყნებთან უვიზო მიმოსვლა გაუქმდეს, რის შემდეგაც, მას ანრი ოხანაშვილმა მიკროფონი გაუთიშა, მიზეზად დაასახელა ის, რომ დეპუტატებს დღეს მხოლოდ მუხლობრივი განხილვის საშუალება აქვთ.

  • "რა ამბავში ხართ, ანრი, გეშინია? არ გინდა, რომ ხალხმა ეს გაიგოს? გაგვიუქმებენ უვიზო მიმოსვლას!", — უთხრა მას სამადაშვილმა, რის შემდეგაც ოხანაშვილმა მანდატურის სამსახურს მოუწოდა, სალომე სამადაშვილი დარბაზიდან გაეყვანათ.

მანამდე, კომიტეტის თავმჯდომარემ დარბაზიდან გააძევა თამარ კორძაიაც, რომელსაც, ასევე შეაწყვეტინა სიტყვა, შემდეგ კი მოითხოვა, რომ დარბაზიდან გასულიყო.

ბოლო ხაზი: პარლამენტში, იურიდიულ საკითხთა კომიტეტის სხდომაზე დღეს რუსული კანონის მეორე მოსმენა მიმდინარეობს.