საქართველოს მართლმადიდებელი ეკლესიის საპატრიარქომ პატრიარქ ილია მეორის მშობლიურ სოფელ სნოში, ვახტანგ გორგასლის სახელობის ტაძრის მიმდებარედ, სადაც ასევე მდებარეობს შიოლა ღუდუშაურის სახელობის სულიერებისა და კულტურის ცენტრი, ახალი სასტუმრო ააშენა.

სასტუმროს გახსნას ესწრებოდა პრეზიდენტი, პრემიერი, პარლამენტის თავმჯდომარე და თავად პატრიარქიც.

სასტურმო სნო

ფოტო: საქართველოს მთავრობა

სასტუმრო სნო 34-ნომრიანია და როგორც ილია მეორემ გახსნის ცერემონიაზე თქვა, სასტუმროდან მიღებული შემოსავალი ადგილზე, სოფლის საჭიროებებს მოხმარდება.

"ეს სასტუმრო აშენდა არა იმიტომ, რომ ვიღაცამ ისარგებლოს და მატერიალური სარგებელი ნახოს, ეს აშენდა იმისათვის, რომ ნახოთ და გაიმეოროთ სხვა რეგიონებში მსგავსი მოქმედება. ჩვენ არ უნდა ვიფიქროთ იმი შესახებ, ჩვენ ვინ დაგვეხმარება, ვინ რას მოგვცემს, ჩვენ უნდა ვიფიქროთ იმის შესახებ, ჩვენ რას მივცემთ სამშობლოს", – თქვა ილია მეორემ.

პრემიერის პრესსამსახურის ცნობით, გიორგი კვირიკაშვილმა სიმბოლური უწოდა პატრიარქის მშობლიურ სოფელში ახალი სასტუმროს გახსნის ფაქტს, რომლის მოგებაც საქველმოქმედო მიზანს - სოფლის მოსახლეობის საჭიროებებს მოხმარდება.

სასტუმრო სნოს საპატრიარქოს მიერ დაფუძნებული შპს სასტუმრო სნო ფლობს.