თბილისში, აღმაშენებლის გამზირზე, იქ, სადაც რამდენიმე კვირის წინ ქსენოფობიური "ქართველთა მარში" გაიმართა, პარტია ერვოპული საქართველო მართავს მსვლელობას "რუსული ფაშიზმის წინააღმდეგ".

პარალელურად დაგეგმილი იყო კონტრაქცია "ქართული მარშის" ორგანიზატორთა მხრიდან, თუმცა, მას შემდეგ, რაც ილია მეორემ ორივე აქციის ორგანიზატორებს აქციის გაუქმებისკენ მოუწოდა, ევროპული საქართველოს მსვლელობის კონტრაქცია არ გაიმართება. თუმცა, რამდენიმე ათეული პირი მაინც არის შეკრებილი რკინიგზელთა კულტურის სახლთან, ისინი ამბობენ, რომ ევროპულ საქართველოს ხელი უნდა შეუშალონ. ადგილზე მობილიზებულია ათეულობით პოლიციელი.

თავის მომხრეებთან მივიდა გია კორკოტაშვილი, რომელმაც მათ დაშლისკენ მოუწოდა, თუმცა, რამდენიმე ადამიანი დაშლის წინააღმდეგია.

ევროპული საქართველოს ერთ-ერთმა ლიდერმა, გიგი უგულავამ On.ge-ს უთხრა, რომ აქციის მიზანია წინააღმდეგობის გაწევა რუსული ფაშიზმისათვის, რომელიც სწორედ "ქართული მარშის" სახელით გაიმართა.

როგორც უგულავა ამბობს, მათი შეკრების მიზანი იმის წარმოჩენაა, რომ საქართველოში ბევრი ადამიანი არ ფიქრობს ქსენოფობიურად და საქართველო არის სტუმრათმოყვარე ქვეყანა უგულავას თქმით, ისინი იცავენ ილიას იდეებს. გიგი უგულავამ ხელისუფლება დაადანაშაულა ქსენოფობიური ჯგუფების წახალისებაში.