რა ხდება: შინაგან საქმეთა სამინისტრო განცხადებას ავრცელებს და იუწყება, რომ რუსთაველის გამზირზე 11 პირი დააკავეს ადმინისტრაციული წესით.

  • რაც შეეხება მშვიდობიანი მომიტინგეების დაშლის მიზნით გამოყენებულ საშუალებებს, შსს აცხადებს, რომ გამოიყენეს წიწაკის სპრეი.
  • "თითოეულ კანონსაწინააღმდეგო ქმედებას, სამართალდამცავი უწყების მხრიდან მოჰყვება შესაბამისი სამართლებრივი რეაგირება", — წერია განცხადებაში.

განცხადებიდან: "რუსთაველის გამზირსა და პარლამენტის შენობის ტერიტორიაზე მიმდინარე აქციის დროს, მიუხედავად შსს-ს მოწოდებისა მიუხედავად აქციის ორგანიზატორებისა და მონაწილეების მიმართ, პროტესტი გამოეხატათ კანონით დადგენილ ფორმებში და არ განეხორციელებინათ ძალადობრივი ქმედებები, აქციის წევრები ფიზიკურად დაუპირისპირდნენ პოლიციელებს და მათი მიმართულებით ისროლეს სხვადასხვა ბლაგვი საგანი, მათ შორის, ქვები და ბოთლები.

  • აღნიშნული მართლსაწინააღმდეგო ქმედების შედეგად, დაშავდა შინაგან საქმეთა სამინისტროს თანამშრომელი რომელიც გადაყვანილია კავკასიის მედიცინის ცენტრში.
  • ასევე, დაზიანებულია სამინისტროს კუთვნილი ავტომობილი."

ომბუდსმენის შეფასება: სახალხო დამცველი, ლევან იოსელიანი, გავრცელებულ განცხადებაში შინაგან საქმეთა სამინისტროს მოუწოდებს, უზრუნველყოს ყველა მოქალაქის გამოხატვისა და შეკრების თავისუფლების დაცვა უსაფრთხო გარემოში და ძალის გამოყენების შემთხვევაში დაიცვას შესაბამისი საერთაშორისო სტანდარტები.

  • "საქართველოს სახალხო დამცველი კიდევ ერთხელ ხაზგასმით აღნიშნავს, რომ შეკრების თავისუფლებაში ჩარევა დასაშვებია მხოლოდ იმ შემთხვევაში, თუ აქცია მიიღებს ძალადობრივ ან/და კანონსაწინააღმდეგო ხასიათს, ამავე დროს ძალის გამოყენება უნდა აკმაყოფილებდეს აუცილებლობისა და პროპორციულობის მკაცრ ტესტს", — წერია ომბუდსმენის განცხადებაში.