დღეს 19:00 საათზე მოქალაქეები პარლამენტის წინ რუსული კანონის წინააღმდეგ აქციას გეგმავენ. პიცერია პაცცა აქციის მონაწილეებს სხვადასხვა ნივთებით მომარაგებასა და საჭიროების შემთხვევაში, დახმარებას სთავაზობს. პიცერია ამის შესახებ ინფორმაციას სოციალურ ქსელში ავრცელებს.

აქციის მონაწილეებს პაცცას ინგოროყვას ფილიალში, საჭიროების შემთხვევაში, პირბადეების, წყლის, წყალბადის ზეჟანგის, ბამბებისა და სხვა ნივთების აღება სრულიად უფასოდ შეუძლიათ.

"მშვიდობა და ევროპაა ის, რაც ყველას გვჭირდება", — წერს პიცერია ფეისბუქზე.

დღეს პარლამენტში, იურიდიულ საკითხთა კომიტეტის სხდომა, სადაც რუსულ კანონს განიხილავდნენ, დაძაბულობისა და ფიზიკური დაპირისპირების ფონზე გაიმართა. პარალელურად, პარლამენტის უკანა შესასვლელთან რუსული კანონის წინააღმდეგ აქცია გაიმართა.