მოკლედ: პარლამენტის იურიდიული კომიტეტის სხდომაზე კომიტეტის თავმჯდომარემ, ანრი ოხანაშვილმა, ოპოზიციონერ დეპუტატ ხატია დეკანოიძეს მიკროფონი ორჯერ გაუთიშა.

  • მიზეზად კი თქვა, რომ "დეზინფორმაციის გავრცელების საშუალებას არავის მისცემს".

დეტალები: დეკანოიძემ თქვა, რომ ბევრი მედიასაშუალების და არასამთავრობო ორგანიზაციების წარმომადგენლებს არ მიეცათ დღევანდელ სხდომაზე დასწრების საშუალება.

  • ოხანაშვილმა მას სიტყვა შეაწყვეტინა და თქვა:
  • "ჩემი ვალდებულებაა დეზინფორმაციის დროს გავთიშო მიკროფონი და ვთქვა სიმართლე. აქ არიან არასამთავრობო სექტორის წარმომადგენლები, ვინც მოგვმართა, მაქსიმალურად ვეცადეთ, დასწრებულიყვნენ, ასევე, მედიაორგანიზაციების სახელით, ვინც ითხოვა დასწრება, მათაც მივეცით საშუალება.

სტრიქონებს შორის: პარლამენტმა გუშინ გაავრცელა განცხადება, სადაც ეწერა, რომ შენობაში ცხადდებოდა უსაფრთხოების ყვითელი დონე და ვიზიტორებს ეზღუდებოდათ შესვლა.

ასევე, საკომიტეტო სხდომისას პარლამენტის შენობაში შესვლა შეეძლოთ მხოლოდ ტელევიზიების ჟურნალისტებს.

  • ონლაინმედიის წარმომადგენლებს, ისევე, როგორც ბიუროს სხდომაზე, რომელზეც რუსული კანონპროექტი დარეგისტრირდა, არც დღეს მოგვცეს შენობაში შესვლის საშუალება.
  • ამ ფაქტს, ონლაინმედიის წარმომადგენლები, პარლამენტის უკანა შესასვლელთან ვაპროტესტებთ.

ფოტო: მარიამ მერლანი / On.ge

ოხანაშვილმა დეკანოიძეს მიკროფონი კიდევ ერთხელ გაუთიშა, როდესაც დეპუტატმა ახსენა ფრაზა "რუსული კანონი" — კომიტეტის თავმჯდომარემ თქვა, რომ "ნებისმიერი მიკროფონი, საიდანაც გაჟღერებული იქნება დეზინფორმაცია, გაითიშება".

  • მოგვიანებით, ამავე მიზეზით გაუთიშა მიკროფონი ანა ნაცვლიშვილსაც.
  • საუბრის დასრულების საშუალება არც თინათინ ბოკუჩავას მიეცა.

ამ თემაზე: რატომ არის ქართული ოცნების კანონი რუსული — მოკლედ და მარტივად

ბოლო ხაზი: საკომიტეტო მოსმენის პარალელურად, პარლამენტის შენობის უკანა შესასვლელთან რუსული კანონის მოწინააღმდეგეების აქცია მიმდინარეობს.

  • კიდევ ერთი აქცია დღეს, 17 საათზე, პარლამენტის წინ არის დაგეგმილი.