რა ხდება: ორგანიზაცია საერთაშორისო გამჭვირვალობა — საქართველოს (TI) თანახმად, თბილისის საქალაქო სასამართლოს მოსამართლე ზვიად შარაძეს, რომელმაც დღეს, 2024 წლის 12 აპრილს, ლაზარე გრიგორიადისს 9-წლიანი პატიმრობა მიუსაჯა, მშობლებისგან 120 000 ლარი აქვს საჩუქრად მიღებული და მეუღლის სახელზე რეგისტრირებულ 4 მიწის ნაკვეთს დეკლარაციაში მალავს.

საგულისხმოა, რომ ზვიად შარაძე 2020 წელს კარტოგრაფების საქმესაც განიხილავდა. "სწორედ 2020 წელს დაადეკლარირა მან მსხვილი საჩუქრის მიღება მშობლებისგან, ხოლო მისმა მეუღლემ 4 მიწის ნაკვეთი დაირეგისტრირა", — აღნიშნავს TI.

საჩუქრები მშობლებისგან: ორგანიზაცია იუწყება, რომ ზვიად შარაძემ და მისმა მეუღლემ 7 წლის განმავლობაში მშობლებისგან საჩუქრად 120 000 ლარზე მეტი მიიღეს.

  • აქედან 108 129 ლარი ზვიად შარაძემ 2019 წელს, თელავის რაიონული სასამართლოდან თბილისის საქალაქო სასამართლოში გადმოსვლის შემდეგ მიიღო.

დამალული უძრავი ქონება: TI-ის თანახმად, მოსამართლე ზვიად შარაძე მის ბოლო 3 დეკლარაციაში არ უთითებს მეუღლის უძრავ ქონებას, კერძოდ ოზურგეთის მუნიციპალიტეტის სოფელ გურიანთაში არსებულ 10,425 კვ.მ. მიწის ნაკვეთებს:

საერთაშორისო გამჭვირვალობა — საქართველო: "დამალული უძრავი ქონების რეგისტრაციისა და მსხვილი საჩუქრის მიღების თარიღი საეჭვოდ ემთხვევა ზვიად შარაძის მიერ 2020 წელს კარტოგრაფების პოლიტიკურად მოტივირებული საქმის მოსამართლეობას. მოვუწოდებთ საგამოძიებო უწყებებს, დაინტერესდნენ აღნიშნული შემთხვევით."

  • ასევე, ორგანიზაცია მოუწოდებს ანტიკორუფციულ ბიუროს, შეისწავლოს ზვიად შარაძის დეკლარაცია.

გაიგე მეტი: დაასრულებს თუ არა კეთილსინდისიერების შემოწმება სასამართლო კლანს