რა ხდებოდა 4 აპრილის საღამოს პარლამენტის შენობასთან

მოკლედ: გუშინ, 4 აპრილს, სამოქალაქო აქტივისტებმა, მათ შორის, რამდენიმე ახალგაზრდულმა მოძრაობამ — ჯიუტი, კარი და ტალღა, რუსულის კანონის წინააღმდეგ სამოქმედო გეგმის შესადგენად, საქართველოს პარლამენტის წინ საინფორმაციო შეხვედრა გამართეს.

იქ მისულ მოქალაქეებს თან ჰქონდათ პლაკატებიც, მათ შორის, წარწერებით — "არა რუსულ კანონს" და "ორი წელი ჯიუტად ევროპისკენ".

შეხვედრის ორგანიზატორებმა პარლამენტის წინ შეკრებილებს მოუწოდეს, მივიდნენ საკანონმდებლო ორგანოს შენობასთან ორშაბათს, 8 აპრილს, რადგან მათი თქმით, შესაძლოა, პარლამენტმა რუსული კანონი ბიუროს სხდომაზე განიხილოს.

**მოქალაქეები პარლამენტის შენობასთან, 2024 წლის 4 აპრილი**

ფოტო: მარიამ მერლანი / On.ge

დეტალები: შეხვედრის მიზანი იყო, საჯაროდ მოხდეს იმ გუნდის ორგანიზება, რომელიც რუსული კანონის წინააღმდეგ ბრძოლაში სხვადასხვა ფორმით ჩაერთვება.

პარლამენტის წინ შეკრებილებს, შეხვედრის ორგანიზატორებმა მიმართეს.

**პარლამენტის მიმდებარე ტერიტორია, 2024 წლის 4 აპრილი**

ფოტო: გიორგი გიორგაშვილი / On.ge

"დღეს შევიმუშაოთ სტრუქტურა, რომ ვართ ერთი დიდი ოფისი, რომელმაც უნდა იმუშაოს ხანგრძლივად და მძიმედ, მტრის — ქართული ოცნების წინააღმდეგ. ჩამოვწერეთ სია, რა დაგვჭირდება ამ პროცესში. მეტი ორგანიზებულობისთვის, უნდა ვიცოდეთ, მაგალითად, ვის ჰყავს მანქანა, ვის შეუძლია ფლაერების დარიგება, ვის აქვს პროექტორი, ვის შეუძლია დიზაინის შექმნა და ასე შემდეგ", — თქვა ნატა ფერაძემ, სამოქალაქო აქტივისტმა.

შეხვედრის ორგანიზატორების თქმით, ყველა საორგანიზაციო დეტალი აიტვირთება ფეისბუქ-ჯგუფში ტალღა, სადაც სხვებსაც შეეძლებათ მოსაზრებების დაფიქსირება.

საორგანიზაციო შეხვედრისას, პარლამენტის შენობის მიმდებარე ტერიტორიაზე მობილიზებული იყო საპოლიციო ძალები და სასწრაფო დახმარების ბრიგადა.

კონტექსტი: 3 აპრილს, ქართული ოცნების აღმასრულებელმა თავმჯდომარემ და უმრავლესობის ლიდერმა, მამუკა მდინარაძემ განაცხადა, რომ ოცნება ისევ აპირებს, "უცხო აგენტად" გამოაცხადოს დამოუკიდებელი მედიასაშუალებები, რომელთა შემოსავლის 20%-ზე მეტის წყარო "უცხოური ძალაა", ანუ საგრანტო პროექტებია.

მდინარაძის თქმით, "კანონპროექტი საქართველოს პარლამენტში დაინიცირდება ზუსტად იმავე ტექსტით, როგორც შარშან იყო".

გასული, 2023 წლის მარტში ანალოგიური კანონპროექტის ინიციირებას საზოგადოება პარლამენტის წინ აპროტესტებდა, სამართალდამცავებმა კი ისინი რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით.

შემდეგ, მძლავრი საზოგადოებრივი წინააღმდეგობის ფაქტორის გამო, მმართველმა პარტიამ კანონპროექტი ჩააგდო.

რედაქციისგან: რატომ არის ქართული ოცნების კანონი რუსული — მოკლედ და მარტივად

ბოლო ამბები:

გირჩევთ

რა ხდებოდა 4 აპრილის საღამოს პარლამენტის შენობასთან

კომენტარები

კვირის ტოპ-5

გირჩევთ

ახლა კითხულობენ

ოკუპირებულ აფხაზეთში რომან დარსალია ქართველთა გენოციდზე საუბრისა და პუტინის კრიტიკის გამო დააკავეს