ევროპული საქართველო ლიდერმა დავით ბაქრაძემ დღეს, 21 ივლისს, ახალციხეში მერობის კანდიდატი, ვაჟა ჩიტაშვილი წარადგინა. ბაქრაძემ მოსახლეობას ევროპული საქართველოს საარჩევნო პროგრამა გააცნო.

ევროპული საქართველოს ამომრჩეველს ბიუროკრატიული ხარჯების, პრემიებისა და დანამატების გაუქმებას და პენსიის ზრდას მოხმარდება ჰპირდება. ახალციხის შემთხვევაში, პენსიის მატებას პარტია 35 ლარით გეგმავს.

ფოტო: ევროპული საქართველო

ჩიტაშვილი 2012-2016 წლებში, მერვე მოწვევის პარლამენტის წევრი იყო ერთიანი ნაციონალური მოძრაობის სიით. პარლამენტის ვებ გვერდის თანახმად, ჩიტაშვილი 2004-2008 წლებში სამცხე-ჯავახეთის საოლქო პროკურორის მოადგილედ მუშაობდა, 2008-2012 წლებში კი იკავებდა ახალციხის მუნიციპალიტეტის გამგებლისა და სამცხე-ჯავახეთის საოლქო პროკურორის თანამდებობას.

ახალციხე ერთ-ერთია იმ შვიდი ქალაქიდან, რომელსაც მმართველი პარტია ქართული ოცნება თვითმმართველი ერთეულის სტატუსის გაუქმებას უპირებს.

საქართველოს პარლამენტმა შვიდი თვითმმართველი ქალაქის - გორის, ამბროლაურის, მცხეთის, ოზურგეთის, თელავის, ახალციხისა და ზუგდიდის მუნიციპალიტეტებთან გაერთიანების დადგენილება რამდენიმე კვირის წინ მიიღო. დადგენილების პროექტს პარლამენტის 85-მა დეპუტატმა დაუჭირა მხარი, 10 კი წინააღმდეგი იყო.

გუშინ, 20 ივლისს, საქართველოს პრეზიდენტმა კანონპროექტს ვეტო დაადო. პრეზიდენტის მოტივირებული შენიშვნების განხილვას პარლამენტი მომავალი კვირიდან დაიწყებს.