რა ხდება: სომხეთის ხელისუფლებამ აკრძალა პროკრემლისტური საავტორო გადაცემების "საღამო ვლადიმირ სოლოვიოვთან“ და "კვირა საღამო ვლადიმერ სოლოვიოვთან“ ტრანსლირება.

  • ამის შესახებ რესპუბლიკის მაღალტექნოლოგიური მრეწველობის მინისტრის მოადგილემ ავეტ პოღოსიანმა განაცხადა.

დეტალები: მისი თქმით, დაბლოკვის მიზეზი გახდა "მუდმივი დარღვევა" იმ შეთანხმებისა, რომელიც რუსეთისა და სომხეთის მთავრობებს შორის ტელეკომუნიკაციების სფეროში თანამშრომლობის შესახებ დაიდო.

  • კერძოდ, დაირღვა ამ შეთანხმების მე-5 მუხლი, რომელიც გულისხმობს "ხალხების და ეროვნული ღირებულებების შეურაცხმყოფელი შინაარსის პროგრამების გამორიცხვას“, ასევე "საარჩევნო კამპანიასა და შიდა პოლიტიკურ ცხოვრებაში ჩარევის გამორიცხვას“.

მანამდე, სომხეთის პრემიერ-მინისტრმა ნიკოლ ფაშინიანმა განაცხადა, რომ რუსული ტელეარხები ერევიან ქვეყნის საშინაო საქმეებში და ახდენენ შიდაპოლიტიკური სიტუაციის დესტაბილიზაციას.

რა საფრთხეს ხედავენ სომხეთში, რუსული ტელეარხებისგან: გასული წლის ბოლოს, სომხეთის მაღალი ტექნოლოგიების სამინისტრომ რუსული მხარე ამ საკითხზე კონსულტაციებისთვის მიიწვია, რათა გამოსავალი ეპოვათ.

  • ამის შემდეგ, სომხეთის ტელევიზიისა და რადიოს კომისიამ ლიცენზია შეუჩერა კომპანია Tospa-ს, რომელიც გადასცემდა რუსული რადიოსადგურის, Sputnik Armenia-ს პროპაგანდისტულ პროგრამებს.

სომხეთის მარეგულირებელმა აუდიოვიზუალური მედიის შესახებ კანონის დარღვევა დაადგინა ორ გადაცემაში: "პარასკევი ტიგრან კეოსაიანთან“ და "აბოვიან Time“.

  • პირველში ავტორმა გააკეთა სომხეთისა და მისი ხალხის მიმართ "დამცინავი და პატივისა და ღირსების დამამცირებელი“ განცხადებები.
  • მეორე შემთხვევაში კი, კომისია ამბობს, რომ "გადასცემდნენ მოსაზრებებსა და განცხადებებს, რომლებიც პანიკას ავრცელებს, ასევე, არ შეესაბამებოდა რეალობას და ეყრდნობოდა არასანდო და გადაუმოწმებელ წყაროებს“.

ერევანი განიხილავს რუსული ტელეარხების გათიშვას მთიანი ყარაბაღის ომის შემდეგ — ეს ომი რეგიონის აზერბაიჯანის კონტროლის ქვეშ მოქცევით დასრულდა, ამ ფონზე კი სომხეთის ურთიერთობები რუსეთთან გაცივდა.

  • ტრანსლირების შეჩერებაზე მსჯელობის ერთ-ერთი მიზეზი არის "ანტისომხური“ შინაარსი, რომელიც საფრთხეს უქმნის ქვეყნის უსაფრთხოებას, განაცხადა მმართველი პარტიის დეპუტატმა ლუსინე ბადალიანმა.
  • მისი თქმით, ეს თემა განიხილება სომხეთის ეროვნული ასამბლეის სხდომებზე "ყოველ ჯერზე, როცა ტელევიზიასთან დაკავშირებული საკითხებზე მსჯელობენ“.