სომხეთს, ევროკავშირსა და აშშ-ს შორის დაგეგმილმა სამმხრივმა შეხვედრამ აზერბაიჯანის უკმაყოფილება გამოიწვია. ის დასავლეთს სომხეთის მიმართ მიკერძოებაში ადანაშაულებს.

ოთხშაბათს, 27 მარტს, აზერბაიჯანის სახელმწიფო საინფორმაციო სააგენტო Azertac-მა გამოაქვეყნა საგარეო საქმეთა სამინისტროს წარმომადგენლის, აიხან ჰაჯიზადეს განცხადება, 5 აპრილს დაგეგმილი შეხვედრის შესახებ.

ჰაჯიზადე ამბობს, რომ ევროკავშირსა და აშშ-ს სომხეთსა და აზერბაიჯანს შორის სამშვიდობო პროცესზე უარყოფითი გავლენა აქვთ და ასევე, "ანტიაზერბაიჯანულ პროპაგანდას“ აწარმოებენ.

მისი მტკიცებით, სომხეთისადმი დასავლეთის მხარდაჭერა არის "ცალმხრივი და მიკერძოებული", რომ დაგეგმილი შეხვედრა არ არის გამჭვირვალე და ინკლუზიური და ეწინააღმდეგება რეგიონში "ნდობისა და სამართლიანობის აღდგენას".

"ეს ქმნის ახალ გამყოფ ხაზებს და ე.წ გავლენის სფეროებს რეგიონში, ნაცვლად იმისა, რომ სომხურ მხარეს მისცეს სტიმული კეთილსინდისიერად მოლაპარაკებისკენ", — თქვა მან.

სომხეთის პარლამენტის სპიკერმა ალენ სიმონიანმა კი თქვა, რომ აზერბაიჯანის რეაქცია, შეიძლება, იყოს იმის მანიშნებელი, რომ ისინი "პროვოკაციას" ამზადებენ.

გასულ კვირას სომხეთის უშიშროების საბჭოს მდივანმა არმენ გრიგორიანმა განაცხადა, რომ შეხვედრა აპრილის დასაწყისში გაიმართება. შეხვედრაში მონაწილეობას მიიღებენ სომხეთის პრემიერ-მინისტრი ნიკოლ ფაშინიანი, ევროკომისიის პრეზიდენტი ურსულა ფონ დერ ლაიენი და აშშ-ის სახელმწიფო მდივანი ენტონი ბლინკენი.

გრიგორიანის თქმით, განიხილავენ "სამმხრივი თანამშრომლობის ასპექტებს, რომლებიც ხელს შეუწყობს სომხეთის განვითარებას".

"ღონისძიების მიზანია სომხეთის მედეგობის გაძლიერება. ღონისძიების შესახებ უფრო დეტალურად ვისაუბრებთ უახლოეს მომავალში“, — განაცხადა მან.

სამშაბათს, 26 მარტს, შეხვედრის დღის წესრიგის შესახებ კითხვაზე, აშშ-ის სახელმწიფო დეპარტამენტის სპიკერმა მეთიუ მილერმა თქვა, რომ ვაშინგტონის მიზანია, წაახალისოს ბაქო და ერევანი, რათა იმუშაონ ორ ქვეყანას შორის უთანხმოების გადალახვაზე და მიაღწიონ ხანგრძლივ, მშვიდობიან შეთანხმებას.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.