მოკლედ: რუსეთმა ბრალი წაუყენა ოთხ კაცს, რომლებიც, მათი თქმით, მონაწილეობდნენ მოსკოვში, კროკუს სითი ჰოლში განხორციელებულ ტერაქტში და მოკლეს, სულ მცირე, 137 ადამიანი.

• ერთ-ერთი დაკავებული სასამართლო დარბაზში ეტლით შეიყვანეს.

დეტალები: თავდასხმაში მონაწილეები, რუსეთის ინფორმაციით, არიან დალერჯონ მირზოევი, საიდაკრამი მუროდალი რაჩაბალიზოდა, შამსიდინ ფარიდუნი და მუჰამედსობირ ფაიზოვი.

ყველა მათგანი ნაცემია. ინტერნეტსივრცეში გავრცელდა მათი დაკითხვის მძიმე კადრებიც. გავრცელებული ცნობებით, სულ მცირე ერთი მათგანი ელექტროშოკით აწამეს.

• ასევე, არსებული ინფორმაციით, რაჩაბალიზოდას, სასამართლო პროცესამდე, ყური ნაწილობრივ მოკვეთეს.

• ფაიზოვს კი, რომელიც სასამართლო პროცესზე საავადმყოფოს ხალათითა და ეტლით მიიყვანეს, სავარაუდოდ, გონება ჰქონდა დაკარგული. "როიტერსის" ინფორმაციით, მას ერთი თვალი აღარ აქვს.

სასამართლოს განცხადებაში ნათქვამია, რომ მირზოევმა "სრულიად აღიარა დანაშაული", ხოლო რაჩაბალიზოდამ "დანაშაული აღიარა".

• რუსეთის სახელმწიფო საინფორმაციო სააგენტო Tass-ის ცნობით, ოთხივე მათგანი ტაჯიკეთის მოქალაქეა.
• სასამართლოს ცნობით, ოთხივე, მინიმუმ 22 მაისამდე, წინასწარ პატიმრობაში იქნება.

რა მოხდა კროკუს სითი ჰოლში: პარასკევს, 22 მარტს, საკონცერტო დარბაზში 4 შეიარაღებული პირი შეიჭრა და ცეცხლი გაუხსნა, დაახლოებით, 6 ათას ადამიანს, რომელიც იქ როკ-კონცერტზე დასასწრებად იყო მისული.

• თავდამსხმელებმა ისროლეს ყუმბარებიც, რის შედეგადაც შენობაში ცეცხლი გაჩნდა.
• შემთხვევა კრასნოგორსკში მოხდა, მოსკოვის ჩრდილოეთით მდებარე გარეუბანში.
• ტერაქტის შედეგად დაიღუპა, სულ მცირე, 137 ადამიანი, ასზე მეტი დაშავდა.

რუსეთის უშიშროების ფედერალური სამსახურის განცხადებით, ბრალდებულები, რომლებიც გუშინ, 24 მარტს სასამართლოს წინაშე წარდგნენ, დააკავეს ბრიანსკის რეგიონში, თავდასხმიდან, დაახლოებით, 14 საათის შემდეგ.

ბრიანსკი მოსკოვიდან სამხრეთ-დასავლეთით დაახლოებით 400 კილომეტრში მდებარეობს.

• მომხდარზე პასუხისმგებლობა ისლამურმა სახელმწიფომ აიღო, უფრო კონკრეტულად, მისმა განშტოებამ, რომელსაც ჰქვია ხორასანის ვილაიეთი (IS-K).
• მოგვიანებით, დაჯგუფებამ გაავრცელა ვიდეოც, სადაც ჩანს, როგორ გაუხსნეს ცეცხლი თავდამსხმელებმა დარბაზში შეკრებილ ხალხს. ვიდეოს ავთენტიკურობა BBC-მ დაადგინა.

ვრცლად: ვინ დგას ტერაქტის უკან მოსკოვში — დეტალები

აშშ-ს ეროვნული უშიშროების საბჭოს სპიკერმა, ედრიენ უოტსონმა, განაცხადა, რომ თავდასხმაზე პასუხისმგებელი მხოლოდ ისლამური სახელმწიფოა და მასში უკრაინის მონაწილეობა არ იკვეთება.

ამ თემაზე: უკრაინა განმარტავს, რატომ არის რუსეთის ბრალდება აბსურდული, რომ ტერორისტები უკრაინაში გეგმავდნენ გადასვლას

• რუსეთში დააკავეს კიდევ 7 პირი, რომლებიც ტერორისტების თავდასხმაში არიან ეჭვმიტანილი.

ნახეთ ყველაფერი, რაც მოსკოვში მომხდარ ტერაქტზეა ცნობილი.