მოკლედ: ამერიკის შეერთებულმა შტატებმა, მოსკოვში მომხდარ ტერაქტამდე რამდენიმე დღით ადრე, რუსეთი გააფრთხილა, რომ ისლამური სახელმწიფო რუსეთის ტერიტორიაზე თავდასხმას გეგმავდა.

  • რუსეთის პრეზიდენტმა ვლადიმირ პუტინმა ამ ინფორმაციას "პროვოკაციული" უწოდა.

დეტალები: ექსპერტები ამბობენ, რომ თავდასხმა რუსეთის ლიდერის რეპუტაციისთვის მძიმე იქნება.

  • მათი თქმით, არა მხოლოდ დაზვერვის სამსახურებმა ვერ იმუშავეს ეფექტიანად, არამედ — პუტინმაც არ გაითვალისწინა აშშ-ის გაფრთხილება, რომ ექსტრემისტები მოსკოვს უმიზნებდნენ.
  • მარტის დასაწყისში, აშშ-ის საელჩომ რუსეთში განაცხადა, რომ "აკვირდება ცნობებს, რომ ექსტრემისტებს მოსკოვში დიდ შეკრებებზე თავდასხმის გეგმები აქვთ". მან გააფრთხილა აშშ-ის მოქალაქეები, თავი აერიდებინათ ასეთი ადგილებისთვის.
  • აშშ-ის ეროვნული უშიშროების საბჭოს სპიკერმა ადრიენ უოტსონმა თქვა, რომ აშშ-ის მთავრობამ ეს ინფორმაცია გაუზიარა რუსეთის ხელისუფლებას.
  • თუმცა, სამშაბათს პუტინმა ამერიკის გაფრთხილებები შეაფასა, როგორც "პროვოკაციული" და თქვა, რომ "ეს ქმედებები ჰგავს აშკარა შანტაჟს და ჩვენი საზოგადოების დაშინებისა და დესტაბილიზაციის განზრახვას".
  • თანაც, ეს პოზიცია რუსეთის ხელისუფლებას ჰქონდა იმის მიუხედავად, რომ გასული თვის განმავლობაში, ისლამურ სახელმწიფოსთან დაკავშირებული რამდენიმე ინციდენტის შესახებ განაცხადა.

ამ თემაზე: "კონტრტერორისტულ ოპერაციას" ინგუშეთში 6 ადამიანი ემსხვერპლა — რა ვიცით

რა შეიძლებოდა ყოფილიყო თავდასხმის მიზეზი: როგორც CNN წერს, ორმა წყარომ თქვა, რომ ნოემბრის შემდეგ არსებობდა დაზვერვის ინფორმაცია იმის შესახებ, რომ ISIS-K — ისლამური სახელმწიფოს ფილიალს, რომელიც აქტიურია ავღანეთსა და მის მიმდებარე რეგიონში, გადაწყვეტილი ჰქონდა თავდასხმა რუსეთზე.

  • ამას გარდა, მოსკოვი ჩაერია სირიის სამოქალაქო ომში, პრეზიდენტ ბაშარ ალ-ასადის მხარდასაჭერად და ISIS-ის წინააღმდეგ.
  • ISIS-K "რუსეთს ხედავს, როგორც თანამონაწილეს იმ ქმედებებში, რომლებიც რეგულარულად ავიწროებენ მუსლიმებს“, — განაცხადა Wilson Center-ის წარმომადგენელმა, მაიკლ კუგელმანმა.

რა ვიცით ტერაქტზე: თავდასხმა საკონცერტო დარბაზში გუშინ, 22 მარტს მოხდა.

კონცერტის დაწყებისას პარტერში შეიარაღებული პირები შეიჭრნენ და ცეცხლი გახსნეს.
შემდეგ კი ისროლეს ყუმბარები.

  • ამ დროის მონაცემებით, დაიღუპა, სულ მცირე, 143 ადამიანი, დაშავდა 100-ზე მეტი.
  • შენობაში გაჩენილი ხანძრის ლოკალიზებას მეხანძრეები მთელი ღამის განმავლობაში ცდილობდნენ.
  • მომხდარზე პასუხისმგებლობა ისლამურმა სახელმწიფომ აიღო.