მოკლედ: პარლამენტის თავმჯდომარე შალვა პაპუაშვილი აცხადებს, რომ "ფსევდოლიბერალურ პროპაგანდასთან: დაკავშირებული კანონპროექტის ყველა დეტალი ორშაბათს, 25 მარტს გახდება ცნობილი.

  • "საზოგადოება გაიგებს, რა სახის რეგულაციები იქნება შემოთავაზებული, ამის შემდეგაც პროცესი დისკუსიისთვის, საზოგადოების ჩართულობისთვის ღია იქნება", — თქვა პაპუაშვილმა.

დეტალები: პაპუაშვილმა აღნიშნა, რომ ოპოზიციურ პარტიებს და არასამთავრობო ორგანიზაციებს საკმარისი დრო ჰქონდათ იმისთვის, რომ დაეფიქსირებინათ საკუთარი პოზიცია — მისაღებია თუ არა "ლგბტ პროპაგანდა" და თუ არ არის, როგორია მათი მოსაზრება, რა რეგულაციები შეიძლება იყოს ისეთი, რომ "ერთი მხრივ, უკლებლივ ყველაფერი დაცული იყოს და მეორე მხრივ, დაშვებული არ იყოს პროპაგანდა".

  • "ჩვენ, უკეთეს შემთხვევაში, ოპონენტების მხრიდან დუმილი ვნახეთ, რაც პროპაგანდის მხარდაჭერას ნიშნავს, ასეც დაფიქსირდება ეს ყველაფერი მათ პოლიტიკურ ისტორიაში", — განაცხადა პაპუაშვილმა.
  • "ჩვენი გამოცდილება აჩვენებს, რომ ის, რაც ხდება ბრიტანეთში, აშშ-ში, თუ სხვაგან, ცოტა ხანში, საქართველოში გადმოდის ხოლმე, მათ შორის, უცხოური დაფინანსების მხარდაჭერით, ამიტომ ჩვენ აქედან უნდა ჩამოვიყალიბოთ პოზიცია, რა უნდა ქართველ საზოგადოებას".

მსგავსი: ხელისუფლების მორიგი კამპანია ჰომოფობიური რიტორიკით, ლევან აკინის ფილმი და ანა ხაზარაძის კომპანია — რა ხდება

კონტექსტი: 29 თებერვალს მამუკა მდინარაძემ განაცხადა, რომ ქართულმა ოცნებამ მიიღო გადაწყვეტილება, მოამზადოს კანონპროექტი, რომელიც საზოგადოებას "ფსევდოლიბერალური იდეოლოგიისგან და მისი გარდაუვალი მავნე შედეგებისგან დაიცავს".

  • "არატრადიციული ცხოვრების წესის მიზანმიმართული პროპაგანდა არის ის, რასთან დაპირისპირებაც არის ჩვენი პასუხისმგებლობა ქართული საზოგადოების და მისი მომავლის წინაშე", — განაცხადა მდინარაძემ.
  • 1-ელ მარტს საქართველოს პრემიერ-მინისტრის ირაკლი კობახიძემ განაცხადა, რომ თუ "ლგბტ პროპაგანდის" ამკრძალავ კანონპროექტში მთავრობის ჩართულობა გახდება საჭირო, კანონპროექტის მომზადებაში ჩაერთვებიან.
  • 2 მარტს, ქართული ოცნების თავმჯდომარემ ირაკლი ღარიბაშვილმა თქვა, რომ საქართველოს მოსახლეობის 90% მიიჩნევს, რომ "აუცილებელია შვილების, შვილიშვილების, ახალგაზრდა თაობის დაცვა ამ მავნებელი ანტიეროვნული, ანტიადამიანური ლგბტ პროპაგანდისგან".

გაიგე მეტი: "პუტინი აფინანსებს ლგბტ თემსაც და რადიკალებსაც" — რას ამბობდა მდინარაძე 2021 წელს და რას ამბობს ახლა

ასევე, წაიკითხეთ: შიშის წარმოება — როგორ ინარჩუნებენ მთავრობები ძალაუფლებას კრემლის ორბიტის ქვეშ