14 მარტს, საქართველოს პრეზიდენტმა სალომე ზურაბიშვილმა მაღალმთიანი აჭარის ფოლკლორის საღამო გამართა ორბელიანების სასახლეში.

  • პრეზიდენტი აცხადებს, რომ ანსამბლი ფესვები, რომელიც აჭარიდან უნდა ჩამოსულიყო, "გზიდან გააბრუნეს.
  • ეს დაადასტურა ანსამბლის ხელმძღვანელმა, ბადრი დარჩიძემაც: "მითხრეს, წადიო — წამოვედი, დაბრუნდიო — დავბრუნდი", — უთხრა მან მთავარ არხს.
  • დარჩიძის თქმით, მან პრეზიდენტის ღონისძიებაზე დასასწრებად შესაბამისი ნებართვისთვის კულტურის ცენტრს ერთი კვირით ადრე მიმართა;

  • პასუხად კი უთხრეს, რომ წერილი "სათანადოდ" იყო შესული და უარის მიზეზად პროცედურული საკითხები დაუსახელეს.

დეტალები: საქართველოს პრეზიდენტი "კულტურულ ბოლშევიზმს" უწოდებს მომხდარს. " თქვენ თვითონ იფიქრეთ, საიდან მოვიდა მითითება და რას ნიშნავს ეს", — თქვა მან.

  • სალომე ზურაბიშვილი: "ძალიან სამწუხაროა, რომ ანსამბლი ფესვები, რომელიც აჭარიდან უნდა ჩამოსულიყო და დღეს ჩვენთან ერთად უნდა ყოფილიყო, გზიდან გააბრუნეს, იმიტომ, რომ თურმე, პრეზიდენტის სასახლეში ნებადართული არ არის მოღვაწეობა.
  • თუ ეს არ არის კულტურული ბოლშევიზმი, მე არ ვიცი, ამას რა ჰქვია.
  • სამწუხაროა და მინდა, მათ, ჩემი სახელით ბოდიში მოვახსენო იმისთვის, რომ გზიდან გააბრუნეს ამ ფორმით და მინდა საზოგადოებას ბოდიში მოვუხადო იმისთვის, რომ ამ ქვეყანაში, დღეს, ასეთი რაღაცები შეიძლება ხდებოდეს."

  • ბადრი დარჩიძე: "რამდენიმე ხელმძღვანელი მყავს. მითხრეს, წადიო — წამოვედი, დაბრუნდიო — დაბრუნდი. მითხრეს, რომ არ ყოფილა წერილი სათანადოდ შემოსული შუახევში, კულტურის ცენტრშიო. სიტყვიერი მიწვევა არა, წერილობით გვინდაო."

ჟურნალისტის კითხვაზე, რომ ხომ რეალურად მიმართა ანსამბლმა კულტურის ცენტრის, დარჩიძე ამბობს: "კი, ერთი კვრის წინ... შესაბამისი მოთხოვნა თუ მოვაო, არ არის პრობლემაო. ფაქტიურად, მე მოვემზადე იმისთვის, რომ წამოვსულიყავი, ხალხი წამომეყვანა. რომ წამოვედი, მერე თქვეს, რომ არ მოსულაო [მიმართვა]."

  • ბადრი დარჩიძის თქმით, "ვიღაც-ვიღაცებმა შეცდომაში შეიყვანეს კულტურის ცენტრი".

ბოლო ხაზი: ორბელიანების სასახლეში გამართულ ღონისძიებაში მონაწილეობა მიიღო სხვა ანსამბლმა, სახელწოდებით — მარგალიტი.