მოკლედ: ლიეტუვის დედაქალაქში, საკუთარ სახლთან თავს დაესხნენ ციხეში გარდაცვლილი რუსი პოლიტიკოსის, ალექსეი ნავალნის თანამებრძოლს, ლეონიდ ვოლკოვს.

  • ინფორმაციას ამის შესახებ ნავალნის პრესმდივანი, კირა იარმიში ავრცელებს.

დეტალები: იარმიში X-ზე წერს, რომ თავდამსხმელები ვოლკოვს სახლის ეზოში მაშინ დაესხნენ თავს, როდესაც ის მანქანაში იჯდა.

  • ჩაქუჩით ჩაამტვრიეს მანქანის ფანჯარა და თვალებში ცრემლსადენი გაზი შეასხეს, შემდეგ კი, როგორც იარმიში ამბობს, ჩაქუჩით მიაყენეს დაზიანებები.
  • მოგვიანებით, ნავალნის გუნდის კიდევ ერთმა წევრმა — ივან ჟდანოვმა გაავრცელა ფოტოები, სადაც ჩანს, რომ ვოლკოვს დაზიანებები აქვს ფეხზე და თავის არეში.
  • ვოლკოვი სასწრაფო დახმარების ბრიგადამ საავადმყოფოში გადაიყვანა.
  • თავდასხმის მოტივი უცნობია, თუმცა ჟდანოვი ამბობს, რომ ეს ცალსახად პოლიტიკურად მოტივირებული იყო.

ბოლო ხაზი: 43 წლის ვოლკოვი უკვე რამდენიმე წელია, რუსეთში აღარ ცხოვრობს, თუმცა ნავალნის გუნდს ლიდერის გარდაცვალებამდე ხელმძღვანელობდა.

  • მას რუსეთში რამდენიმე პოლიტიკურად მოტივირებული ბრალდება აქვს წაყენებული.