თბილისის მერობის დამოუკიდებელი კანდიდატის, ალეკო ელისაშვილის საარჩევნო შტაბს ორგანიზაცია "ცხენების გადარჩენის ცენტრის" დამფუძნებელი, ვანო ნორაკიძე, ხოლო მედიასთან ურთიერთობას, საზოგადოებრივი მაუწყებლის ყოფილი ჟურნალისტი, ლაშა მესხი უხელმძღვანელებს.

რამდენიმე თვის წინ, მაუწყებელმა ლაშა მესხს ხელშეკრულება აღარ გაუგრძელა. ის მაუწყებელში პროფკავშირს წარმოადგენდა და სწორედ მის აქტივობას უკავშირებს ტელევიზიიდან დათხოვნას, რაც მოგვიანებით სახალხო დამცველმაც დაადგინა.

ალეკო ელისაშვილმა გუნდის წევრები დღეს, 20 ივლისს წარადგინა და აღნიშნა, რომ ვანო ნორაკიძესთან ერთად 2014 წლის თვითმმართველობის არჩევნების დროს მუშაობდა:

"ვანო ახალგაზრდაა, მაგრამ იგი უკვე იურისტულ წრეებში სახელმოხვეჭილი კვალიფიციური ადამიანია. ჩვენ ერთად გვაქვს სამი წლის წინ გავლილი საარჩევნო პერიპეტიები. მაშინ ვანო იყო ჩემი საარჩევნო შტაბის წევრი, თავდაუზოგავი მუშაკი და მშრომელი. ჩვენ ერთად გვაქვს გამოცდილი, თუ როგორ უნდა გავიმარჯვოთ არჩევნებში. რაც შეეხება ლაშას, მე ვფიქრობ რომ ეს არის წესიერი, კვალიფიციური, მებრძოლი და შეუპოვარი ადამიანი".

ლაშა მესხის თქმით, ისინი უახლეს პერიოდში წარმოადგენენ საარჩევნო პროგრამასა და ასევე, გუნდის სხვა წევრებს.

საქართველოში ადგილობრივი თვითმმართველობის არჩევნები 2017 წლის ოქტომბრის ბოლო კვირას გაიმართება. თბილისის მერობის ოფიციალურად დასახელებული კანდიდატები არიან ზაალ უდუმაშვილი ერთიანი ნაციონალური მოძრაობიდან და ელენე ხოშტარია ევროპული საქართველოდან, კახა კალაძე ქართული ოცნებიდან და დამოუკიდებელი კანდიდატი ალეკო ელისაშვილი.