რა ხდება: 2024 წლის 15-17 მარტის საპრეზიდენტო არჩევნების შემდეგ, ვლადიმერ პუტინი, სავარაუდოდ, განახორციელებს მნიშვნელოვან გადანაცვლებებს მთავრობაში, — წერს ბლუმბერგი პრეზიდენტის ადმინისტრაციისა და მინისტრთა კაბინეტის წყაროებზე დაყრდნობით.

  • გამოცემა აღნიშნავს, რომ ასეთი მასშტაბური ცვლილებები მთავრობაში პირველად მოხდება 2020 წლის შემდეგ, როდესაც პრემიერ-მინისტრის პოსტზე დიმიტრი მედვედევის ნაცვლად მიხაილ მიშუსტინი დაინიშნა.
  • პუტინი ცდილობს, განაახლოს თავისი გუნდი ახალი ექვსწლიანი ვადის დაწყებისთანავე.
  • ამასთან, არ არსებობს ნიშნები იმისა, რომ თავად პუტინი ვინმეს ამზადებდეს თავის პოტენციურ მემკვიდრედ, — ვკითხულობთ ბლუმბერგის სტატიაში.

დეტალები: გამოცემის ორი თანამოსაუბრის თქმით, 72 წლის ენერგეტიკის მინისტრი ნიკოლაი შულგინოვი შესაძლოა, გადადგეს და მის პოსტს დაიკავებს ბორის კოვალჩუკი, პუტინის მეგობრის და როსია ბანკის აქციონერის, იური კოვალჩუკის ვაჟი.

  • ბორის კოვალჩუკი, სავარაუდოდ, ამ კვირაში ინტერ რაოს ენერგეტიკული ჰოლდინგის ხელმძღვანელის პოსტს დატოვებს.

ბლუმბერგის სამი წყარო ახალ თანამდებობაზე კიდევ ერთ კანდიდატად ასახელებს დიმიტრი პატრუშევს, სოფლის მეურნეობის მინისტრს. ის არის უშიშროების საბჭოს მდივნის, ნიკოლაი პატრუშევის შვილი.

  • დიმიტრი პატრუშევის კანდიდატურა ვიცე-პრემიერის პოსტზე განიხილება.
  • ბლუმბერგი მის ამ კარიერულ ზრდას მოიხსენიებს, როგორც ჯილდოს პატრუშევისთვის, იმის გათვალისწინებით, რომ სოფლის მეურნეობის ინდუსტრიის ზრდას რუსეთში ერთ-ერთი ყველაზე დიდ წარმატებად მიიჩნევენ ბოლო წლებში.

პრემიერ-მინისტრი მიხაილ მიშუსტინი, სავარაუდოდ, შეინარჩუნებს თავის პოსტს, — აცხადებენ Bloomberg-ის წყაროები. თუმცა, გამოცემის ერთ-ერთი თანამოსაუბრის თქმით, "არსებობს შანსი", რომ მას შეცვლის პრეზიდენტის ადმინისტრაციის ხელმძღვანელის ამჟამინდელი მოადგილე, სერგეი კირიენკო.

ბოლო ხაზი: მათ შორის, ვინც სავარაუდოდ, ასევე შეინარჩუნებს პოსტს, ბლუმბერგის წყაროები ასახელებენ ფინანსთა მინისტრს ანტონ სილუანოვს.

გამოცემის თანამოსაუბრეებს არ აქვთ ინფორმაცია ვიცე-პრემიერ ალექსანდრე ნოვაკის, ასევე, 74 წლის საგარეო საქმეთა მინისტრის, სერგეი ლავროვისა და 68 წლის თავდაცვის მინისტრის, სერგეი შოიგუს შეცვლის შესახებ.