სულ ცოტა ხნის წინ შედგა პრემიერა სიმღერისა, რომლითაც საქართველო 2024 წლის ევროვიზიაზე წარდგება. ნუცა ბუზალაძისთვის საკონკურსო კომპოზიცია, სახელწოდებით Firefighter ("ცეცხლთან მებრძოლი"), ჩრდილოეთმაკედონიელმა დარკო დიმიტროვმა და ალბანელმა ადა სატკამ დაწერეს.

"ასეთ სიმღერაზე დიდი ხნის განმავლობაში ვოცნებობდი", — ამბობს ბუზალაძე, — "მსურდა, ასე გავეცნე მსმენელს: როგორც არტისტი, რომელიც საკუთარ სიმღერაში თავს კომფორტულად გრძნობს და შეუძლია, თავისი ხასიათი აჩვენოს".

სიმღერასთან ერთად, გამოვიდა მასზე გადაღებული ვიდეოკლიპიც, რომლის რეჟისორი ზაზა ორაშვილია, მხატვარი — შაკო პოპიაშვილი, ქორეოგრაფი კი ლუიჯი ალოკა გახლავთ. ამასთან, ვიდეოში ქართველი და იტალიელი მოცეკვავეებიც მონაწილეობენ.

წლევანდელ ევროფესტივალზე საქართველოს წარმომადგენელი საზოგადოებრივმა მაუწყებელმა პირდაპირი გზით, შიდაშესარჩევი კონკურსის გარეშე დაასახელა იანვარში. იმავე თვეში გამოცხადდა კონკურსი სიმღერის შესარჩევად. როგორც ცნობილია, კომპოზიცია Firefighter 300-ზე მეტი განაცხადიდან შეირჩა.

აღსანიშნავია, რომ ნუცა ბუზალაძე ევროვიზიის შიდაშესარჩევ კონკურსში 2017 წელსაც მონაწილეობდა. მომღერალმა მაშინ მე-2 ადგილი დაიკავა.

მანამდე, 2014 წელს, ბუზალაძე გახდა საერთაშორისო კონკურს ახალი ტალღის გამარჯვებული. გასულ წელს იგი ასევე მონაწილეობდა American Idol-ში.

ფოტო: Nutsa Buzaladze / Instagram

გასულ ზაფხულს ნუცა ბუზალაძემ რუსეთში იმღერა, რის გამოც საზოგადოების კრიტიკა დაიმსახურა. 24 ივნისს ინტერნეტსივრცეში გავრცელდა ვიდეო, სადაც ჩანდა, რომ რამდენიმე ქართველი მომღერალი, მათ შორის, ნუცა ბუზალაძე, დათო ხუჯაძე, მიშო სულუხია და სხვები მოსკოვის ერთ-ერთ რესტორანში ერთობოდნენ. მომღერლებმა ღონისძიებაზე სიმღერა სამშობლოც შეასრულეს.

ვიდეოებში ვნახეთ რუსეთში მოღვაწე მომღერალი სოსო პავლიაშვილი და მეგი გოგიტიძე, რომელიც უკრაინის ომის ფონზეც აგრძელებდა რუსეთში სიმღერას. წვეულებას ესწრებოდა პუტინისტური ძალადობრივი ჯგუფის, ალტ-ინფოს დამფუძნებელი, კონსტანტინე მორგოშიაც. დაბადების დღიდან ვიდეოები სოციალურ ქსელში ეკატერინა სტეფანოვამაც გაავრცელა. მოგვიანებით ბუზალაძემ რუსეთში სიმღერისთვის ბოდიში მოიხადა.

ფოტო: Corinne Cumming / EBU

რიგით 68-ე ევროვიზიის სიმღერის კონკურსს შვედეთის ქალაქი მალმე უმასპინძლებს. წლევანდელი ევროფესტივალის ნახევარფინალური შოუები 7 და 9 მაისს, ფინალი კი 11 მაისს გაიმართება. კონკურსში 37 ქვეყანა მიიღებს მონაწილეობას.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...