მოკლედ: ნიკა მელია და ნიკა გვარამია არჩევნებში ერთად იბრძოლებენ.

  • ამის შესახებ გვარამიამ ერთობლივ ბრიფინგზე, "შერატონში" განაცხადა.

დეტალები: "ჩვენი პარტია არის ახალი, ჩვენ ვართ ერთად, ჩვენ ვიცით ბრძოლა, ვიცით რა ფასი აქვს მოუსყიდაობას, ვიცით როგორ ვმართოთ", — თქვა გვარამიამ.

  • ნიკა მელიამ კი აღნიშნა, რომ სამი თვის განმავლობაში მსჯელობდნენ გაერთიანების შესახებ, საბოლოოდ კი მიიღეს გადაწყვეტილება, რომ ერთად იბრძოლონ.
  • "ვადასტურებთ, რომ შედგა ერთობა ადამიანებისა, რომლებსაც გვაერთიანებს მომავალი და მომავალია ჩვენი საერთო მიზანი, გამარჯვებაა ჩვენი საერთო მიზანი და არა შურისძიება", — თქვა მელიამ.

ნაციონალური მოძრაობის ყოფილი თავმჯდომარე ამბობს, რომ გამარჯვების რწმენა აკლია ბევრს და ეს ერთობა, მისი აზრით, "მოიტანს ნიჰილიზმის დამარცხებას".

"დარწმუნებული ვარ, რომ დაკვეთა, რომელიც საზოგადოებაშია, ვპასუხობთ დღეს. დღეს აქ შევიკრიბეთ ძალიან ვიწრო წრეში. როგორც ნიკა გვარამიამ აღნიშნა, ეს არ არის პარტიული ყრილობა. სულ ცოტა ხანში გვექნება სადამფუძნებლო პარტიული ყრილობა და იქ გამოჩნდება კიდევ უფრო მკაფიოდ, თუ რამდენი ადამიანია მზად, იბრძოლოს სიმართლითა და ღირსებით.
ჩვენს ბრძოლას გამარჯვების რწმენას აქვს კონკრეტული სახელი ამიერიდან და ეს სახელი არის "ახალი", ჩვენს გზას წინ მომავლისკენ აქვს კონკრეტული სიმბოლო და ეს სიმბოლო არის ნომერი 4", — თქვა მელიამ.

გაერთიანდებიან თუ არა სხვა პოლიტიკურ ძალებთან: ნიკა გვარამიას თქმით, ამისი სურვილი აქვთ.

  • "მე მომხრე ვარ დიდი გაერთიანებების, მე ნებისმიერი რამის დათმობისთვის ვარ თანახმა, გამარჯვების სანაცვლოდ, მაგრამ ეს ვერ იქნება მხოლოდ ჩვენი ინიციატივა. არ მოგიწოდებთ რომ შემოგვიერთდეთ, მე გთავაზობთ, გავერთიანდეთ", — თქვა გვარამიამ.