ახლახან ოსკარი 2024-ის დაჯილდოების ცერემონია ჩატარდა და გამარჯვებულები დასახელდნენ. წელს Oppenheimer-მა 7 ოსკარი მოიპოვა და ჯილდოების რაოდენობით ყველას გაუსწრო. მუსიკალური ნომრების გარეშე არც წლევანდელ ოსკარს ჩაუვლია და რაიან გოსლინგმა ოსკარი 2024-ის სცენაზე I’m Just Ken შეასრულა, რასაც მსახიობის ფანები მოუთმენლად ელოდნენ.

I’m Just Ken-ის შესრულებისას რაიან გოსლინგს ბარბის ინსპირაციით შექმნილი სამოსი ეცვა. ვარდისფრებში გამოწყობილი მსახიობი სიმღერის შესასრულებლად კენის სათვალით გამოვიდა, მოცეკვავეებს შორის კი სწორედ ბარბის მსახიობები – სიმუ ლიუ და კინგსლი ბენ-ადირი — იყვნენ, რომლებმაც ფილმში სხვადასხვა კენი განასახიერეს.

სიმღერის შესრულება რაიან გოსლინგმა მარგო რობის, ამერიკა ფერერასა და ბარბის რეჟისორ გრეტა გერვიგის გვერდით დაიწყო, შემდეგ კი სცენაზე ავიდა. I’m Just Ken-ის სიმღერაში ბარბის მსახიობების გარდა ემა სტოუნიც ჩაერთო, რომელთან ერთადაც რაიანმა La La Land-ში მთავარი როლი შეასრულა.

მართალია, წინასწარ იყო ცნობილი, რომ რაიან გოსლინგი ოსკარის დაჯილდოების ცერემონიაზე I’m Just Ken-ს შეასრულებდა, მაგრამ სცენაზე Slash-ის გამოჩენა მაყურებლისთვის ნამდვილი სიურპრიზი აღმოჩნდა. Guns N’ Roses-ის წევრი სცენაზე რაიანის გვერდით გამოვიდა და გიტარაზე დაუკრა.

ოსკარი 2024-ზე საუკეთესო ორიგინალური სიმღერის კატეგორიაში ბარბის ორი სიმღერა იყო წარდგენილი: I’m Just Ken და ბილი აილიშის What Was I Made For, ოსკარი კი ბილი აილიშმა მოიპოვა.