2024 წლის ევროვიზიის სიმღერის კონკურსზე შარშანდელ მასპინძელს, გაერთიანებულ სამეფოს, ცნობილი მომღერალი ოლი ალექსანდერი წარადგენს. მსოფლიოში ალექსანდერს ჯგუფ Years & Years-ის წამყვან ვოკალისტად იცნობენ. 33 წლის პოპვარსკვლავი კი ამჯერად ძალებს ევროფესტივალზე მოსინჯავს. მისი საკონკურსო სიმღერა, სინთპოპის ჟანრის კომპოზიცია Dizzy, რამდენიმე დღის წინ გამოვიდა.

აღსანიშნავია, რომ სიმღერაზე ვიდეოკლიპი საქართველოში, ქართულ საპროდიუსერო გუნდთან თანამშრომლობითაა გადაღებული. ალექსანდერი კლიპზე სამუშაოდ თბილისში თებერვლის შუა რიცხვებში ჩამოვიდა და წლევანდელი ევროვიზიის ქართველ მონაწილეს, ნუცა ბუზალაძესაც, შეხვდა.

რაც შეეხება ვიდეოკლიპს: როგორც გითხარით, მასზე მრავალი პრიზის მფლობელმა ქართულმა საპროდიუსერო კომპანიამ, Shelter.Film-მა იმუშავა უცხოელ კოლეგებთან ერთად. გუნდის შესახებ დაწვრილებით ინფორმაციას ვიდეოს აღწერაშიც ნახავთ.

რიგით 68-ე ევროვიზიის სიმღერის კონკურსს შვედეთის ქალაქი მალმე უმასპინძლებს. წლევანდელი ევროფესტივალის ნახევარფინალური შოუები 7 და 9 მაისს, ფინალი კი 11 მაისს გაიმართება. კონკურსში 37 ქვეყანა მიიღებს მონაწილეობას.

საქართველო ევროვიზიაზე წელს უკვე მეთექვსმეტედ წარდგება. იანვარში გახდა ცნობილი, რომ ჩვენს ქვეყანას ევროფესტივალზე ნუცა ბუზალაძე წარადგენდა. იმავე თვეში გამოცხადდა კონკურსი სიმღერის შესარჩევად. ბუზალაძის საკონკურსო კომპოზიცია, რომელსაც მარტში მოვისმენთ, 300-ზე მეტი განაცხადიდან შეირჩა. მასზე ჯერჯერობით მხოლოდ ის ვიცით, რომ ბალადა არაა — ეს თავად მომღერალმა დაადასტურა ინსტაგრამზე.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...