რა ხდება: რუსეთში აპირებენ, "VPN-ების პოპულარიზაციის აკრძალვის მიზნით", ვიკიპედია აკრძალონ. ამის შესახებ ტელეგრამზე დაწერა სახელმწიფო სათათბიროს დეპუტატმა ანტონ გორელკინმა.

  • "შეიძლება, ვიკიპედია დაიბლოკოს რუსეთში ახალი კანონით, რომელიც კრძალავს VPN-ების პოპულარიზაციას, რადგან ვიკი სტატიები არა მხოლოდ აღწერს ვებგვერდებზე შეღწევის გზებს ბლოკირებაზე გვერდის ავლით, არამედ ურჩევს კიდეც მომხმარებლებს, გამოიყენონ ისინი, რაც სრულ წინააღმდეგობაში მოხდის როსკომნადზორის კრიტერიუმებთან", — დაწერა მან.

როსკომნადზორი არის კომუნიკაციის სფეროში რუსეთის ფედერალური ზედამხედველობის სამსახური.

  • 2022 წელს უწყებამ განაცხადა, რომ ვიკიპედიას დააჯარიმებდნენ "არასანდო საზოგადოებრივი დანიშნულების მასალებსა და სხვა აკრძალული ინფორმაციის გავრცელებისთვის".
  • ვიკიპედია მსოფლიოში ყველაზე დიდი ციფრული ენციკლოპედიაა.

სახელმწიფო სათათბიროს დეპუტატმა "პრობლემად" გამოყო ისიც, რომ "ყველა ღირებული ინფორმაცია", რომელიც ხელმისაწვდომია ვიკიპედიის რესურსზე, უკვე დუბლირებულია და რუნეტზეა განთავსებული".

კონტექსტი: რუსეთში წლებია იღებენ კანონებს, რომლითაც ზღუდავენ როგორც კრემლის ცენზურისგან დამოუკიდებლად ინფორმაციის წარმოებასა და გავრცელებას, ასევე, კანონებს, რომელიც ზღუდავს სიტყვისა და გამოხატვის თავისუფლებას. ასეთი კანონები განსაკუთრებით გაამკაცრეს 2022 წლიდან, როდესაც პუტინმა დაიწყო სრულმასშტაბიანი ომი უკრაინის წინააღმდეგ. ამას რუსეთში დამოუკიდებელი მედიასაშუალებების დახურვა მოჰყვა, მოქალაქეთა იშვიათი პროტესტი კი, ხშირ შემთხვევაში, მათი დაკავებით სრულდება.

ფართო სურათში: 2006 წელს, პუტინის ადმინისტრაციამ მიიღო ე.წ. არასამთავრობოების კანონი, რომლითაც სექტორზე რეგულირება გაზარდა.

  • 2012 წელს კი რუსეთში მიიღეს ის კანონი, რომლის იდენტური ანალოგიც ქართულმა ოცნებამ და მათ საპარლამენტო უმრავლესობაში შემავალმა ხალხის ძალამ 2023 წლის მარტში დააინიციირა, რასაც მასობრივი საპროტესტო აქცია მოჰყვა. საქართველოს მთავრობამ აქცია ჯერ ორჯერ, ძალის გამოყენებით დაშალა, შემდეგ კი კანონპროექტი ჩააგდო. ახლა იმავე კანონის მიღებას საქართველოს ოკუპირებულ რეგიონში, აფხაზეთში აპირებენ.

  • 2013 წელს რუსეთში მიიღეს კანონი, რომელიც "LGBTQI+ პროპაგანდას" ეწინააღმდეგება. 2022 წლის ნოემბერში პუტინმა ხელი მოაწერა "გეი პროპაგანდის" კანონპროექტს. კანონპროექტი კრძალავს ყველაფერს, რასაც ხელისუფლება მიიჩნევს ლგბტქ პროპაგანდად — მედიაში, კინოში, წიგნებსა და რეკლამებში. ამ კანონით ყველანაირი საქმიანობა შეეზღუდა იმ არასამთავრობო ჯგუფებსა და აქტივისტებს, ვინც ყველაზე ჩაგრული ჯგუფების უფლებებისთვის იბრძოდნენ. იმავე მიზნებით, კანონპროექტის ინიციირებას აპირებს საქართველოს პარლამენტში ქართული ოცნება 2024 წლის მარტში.