2017 წლის 18 ივლისის, გორში, სახალხო დამცველის აპარატის რეგიონული ოფისი გაქურდეს. ომბუდსმენის აპარატის ცნობით, თანამშრომელს ოფისის კარი გატეხილი და თავად ოფისი გაქურდული დახვდა:

"წაღებულია ოფისის კუთვნილი ტექნიკა - პორტატიული სამუშაო კომპიუტერი, რომელშიც სახალხო დამცველის რეგიონულ ოფისში შესული განცხადებების ელექტრონული ვერსიები ინახებოდა."

სახალხო დამცველის წარმომადგენელსა და განმცხადებელს შორის არსებული ურთიერთობა კონფიდენციალურია, შესაბამისად, კომპიუტერში არსებული მასალის რაიმე სახით გასაჯაროებამ, შესაძლოა, მნიშვნელოვნად დააზიანოს განმცხადებელთა ინტერესები ადამიანის უფლებების დაცვის თვალსაზრისით.

შინაგან საქმეთა სამინისტროს ცნობით, გამოძიება 177-ე მუხლის მეორე ნაწილის ბ ქვეპუნქტით მიმდინარეობს, რაც სადგომში ან სხვა საცავში უკანონო შეღწევით ქურდობას გულისხმობს. დანაშაული ისჯება თავისუფლების აღკვეთით ვადით სამიდან ხუთ წლამდე.